Panama AQSh sanksiyalari tufayli Rossiya bilan aloqador 128 ta neft tashuvchi kemani ro‘yxatdan chiqarishga qaror qildi

Bu haqida Bloomberg xabar berdi.

Agentlik bu haqda Panama Dengiz boshqarmasi qoshidagi savdo floti boshlig‘i Ramon Frankoga tayanib xabar bermoqda.

Amaldorning ta’kidlashicha, kamida 70 ta neft tashuvchi kema allaqachon reestrdan chiqarilgan bo‘lib, ular endi Panama bayrog‘i ostida suzish huquqiga ega emas. Yaqin kunlarda ro‘yxatdan yana o‘nlab kemalar olib tashlanadi.

Fevral oyiga kelib, AQSh sanksiyalari ro‘yxatiga kiritilgan Rossiya bilan bog‘liq neft tashuvchi kemalarning umumiy soni 270 tadan oshgan. Ularning hajmi Rossiyadan dengiz orqali eksport qilinadigan neftning yarmini yoki kuniga 1,5 million barrelni tashkil etadi, shundan taxminan 1 million barreli Xitoyga, 500 ming barreli esa Hindistonga jo‘natiladi.

Bloomberg nashrining xabar berishicha, sanksiya ostidagi kemalarni ro‘yxatdan o‘tkazishdan voz kechish Panama uchun 2 million dollargacha daromad yo‘qotishni anglatadi. Biroq mamlakat shu yo‘l bilan sanksiyalarga rioya qilishga tayyorligini namoyish etmoqda. Panama reestrida jami 8000 dan ortiq kema mavjud bo‘lib, u uzoq vaqt davomida bayroq olish uchun qulay joy sifatida yetakchilik qilgan. Ro‘yxatdan chiqarilgan kemalar boshqa mamlakatda ro‘yxatdan o‘tishi yoki bayroqsiz holda dengizga chiqishi mumkin.