Moskva Kiyevni otashkesimdan foydalanishga urinishda ayblamoqda

Vladimir Putinning 8-11 may kunlari o‘t ochishni to‘xtatish tashabbusi ramziy ishora emas, balki hech qanday shartlarsiz to‘g‘ridan-to‘g‘ri muzokaralarni boshlash taklifidir. Bu haqda Rossiya tashqi ishlar vaziri Sergey Lavrov Braziliyada bo‘lib o‘tgan matbuot anjumanida ma’lum qildi.

" Prezident Putin bildirgan bizning taklifimiz oldindan hech qanday shartlarsiz to‘g‘ridan-to‘g‘ri muzokaralarning boshlanishidir. Bunday vaziyatda o‘t ochishni to‘xtatish (AQSh va Ukraina taklif qilayotgan 30 kunga – muharrir eslatmasi) [muzokaralar uchun] old shart sifatida ko‘rilmoqda, bundan Kiyev rejimini yanada qo‘llab-quvvatlash va uning harbiy salohiyatini mustahkamlash uchun foydalaniladi ”, dedi Lavrov.

Uning so‘zlariga ko‘ra, Moskva Kiyevning o‘t ochishni to‘xtatish rejimiga rioya qilish haqidagi va’dalariga ishonmaydi va “halol monitoring” uchun sharoitlarni ko‘rmayapti.

" Bir oy oldin ular hech qanday sulhni qabul qilmasliklarini aytishgan edi, ammo hozir Kiyev rejimi Ukraina rejimi chekinayotgan joyda sodir bo‘layotgan voqealar fonida, hech qanday shartlarsiz o‘t ochishni to‘xtatishni talab qilmoqda ", deya qo‘shimcha qildi Rossiya TIV rahbari.

Rossiya prezidenti Vladimir Putin 28 aprel kuni Rossiya qo‘shinlari Ulug‘ Vatan urushidagi g‘alabaning 80 yilligi sharafiga — 8-may yarim tundan 11-mayga o‘tar kechasigacha o‘t ochishni to‘xtatishini ma’lum qildi.

Bunga javoban Ukraina prezidenti Vladimir Zelenskiy kamida 30 kunga zudlik bilan o‘t ochishni to‘xtatishni taklif qildi.

AQSh ma’muriyati vazminlik bilan javob qaytardi. Oq uy matbuot kotibining aytishicha, Donald Tramp doimiy otashkesimga erishmoqchi, biroq har ikki tomonning harakatlaridan “borgan sari norozi”.

Trampning maxsus vakili Keyt Kellog 29 aprel kuni Putinning taklifini “absurd” deb atadi va uch kunlik tanaffus muammoni hal qilmasligini ta’kidladi.