MIB, hokimiyat, fuqaro: Oliy sud O‘rtachirchiqdagi mojaroga rasmiy izoh berdi

Oliy sud 2020 yil 25 mayda YouTube tarmog‘ida e’lon qilingan videomurojaat yuzasidan ma’lumot berdi.

"Fuqarolik ishlari bo‘yicha O‘rtachirchiq tumanlararo sudining ish yurituviga da’vogar O‘rtachirchiq tumani hokimligining javobgar U. Ro‘ziboyevaga nisbatan o‘zboshimchalik bilan qurilgan qurilmani buzish haqidagi da’vo arizasi 2020 yil 21 fevral kuni kelib tushgan va ishni sudda ko‘rish 2020 yil 11 mart kuni soat 14.00 ga tayinlanib, ishni sudda ko‘rish vaqti va joyi to‘g‘risida taraflar tegishli tartibda xabardor qilingan.

Biroq, javobgarning sud majlisiga kelmaganligi sababli ishni ko‘rish 2020 yil 20 mart kuni soat 14.00 ga qoldirilgan va sudda ishni ko‘rish vaqti va joyi to‘g‘risida javobgarga sud chaqiruv qog‘ozi tegishli tartibda yuborilgan.

2020 yil 20 mart kuni javobgarning sud majlisiga kelmaganligi, da’vogar vakili fuqarolik ishini javobgarning ishtirokisiz sirtdan ko‘rish haqidagi ariza bilan murojaat qilgani sababli fuqarolik ishi javobgarning ishtirokisiz ko‘rilib, da’vo ariza sirtdan qanoatlantirilgan va Toshkent viloyati O‘rtachirchiq tumani “O‘choqli” MFY Fayziobod ko‘chasida yashovchi javobgar U. Ro‘ziboyeva tomonidan o‘zboshimchalik bilan qurilgan 52,20 kv. m yer maydonidagi omborxona, bostirma va yozgi oshxona binolarini javobgar tomonidan majburiy tartibda buzdirish hamda yer maydonini asl holiga qaytarish belgilangan.

Sudning mazkur hal qiluv qarori nusxasi pochta xizmati aloqasi orqali javobgarga ma’lumot uchun yuborilgan.

Javobgar U. Ro‘ziboyeva sudga sirtdan chiqarilgan hal qiluv qarorini bekor qilib, fuqarolik ishini qayta ko‘rish haqidagi ariza bilan murojaat qilgan.

Ushbu sudning 2020 yil 29 maydagi ajrimi bilan javobgarning sud majlisida ishtirok etmaganlik sabablari uzrli deb topilib, ariza qanoatlantirilgan va sirtdan hal qiluv qarori bekor qilinib, fuqarolik ishini mazmunan qayta ko‘rish tiklangan.

Shuningdek, mamlkatimizda karantin e’lon qilinganligi va O‘rtachirchiq tumani hozirgi kunda “qizil” hudud toifasiga kiritilgani sababli ishni ko‘rish keyinga qoldirilgan.

Shu bilan birga ma’lum qilinadiki, dastlabki tergov organi hujjatlariga ko‘ra, A. Ro‘ziboyev (1985 yilda Toshkent viloyatida tug‘ilgan) 2020 yilning 1 may kuni, soat 15:30 larda MIB O‘rtachirchiq tuman bo‘limi xodimlari A. Usmonov, S. Islomiddinov va A. Nazirqulovlar fuqarolik ishlari bo‘yicha O‘rtachirchiq tumanlararo sudning 2020 yil 20 martdagi 2-1104-2003/1059-sonli ijro varaqasiga asosan tumanning “O‘choqli” MFY Fayziobod ko‘chasida yashovchi fuqaro U. Ro‘ziboyeva tuman xokimligi da’vosiga ko‘ra o‘tkazilgan sud majlisining 2020 yil 20 martdagi hal qiluv qaroriga asosan u 52,2 kv. m maydonda omborxona, bostirma va yozgi oshxona binolarni o‘zboshimchalik bilan qurishda javobgar deb e’tirof etilib, noqonuniy qurilmalarni javobgar xisobidan majburiy tartibda buzdirish belgilanganligi, ushbu hal qiluv qaroriga asosan majburiy ijro byurosi O‘rtachirchiq tuman bo‘limi tomonidan ijro ishi yuritilganligi, sud ijro hujjatida ko‘rsatilgan talablarni ixtiyoriy ravishda bajarish uchun javobgarga 15 kunlik muddat belgilanganligini ogohlantirish uchun borgan.

Ammo, javobgarning o‘g‘li A. Ro‘ziboyev o‘z xizmat vazifalarini bajarayotgan hokimiyat vakillari, ya’ni MIB O‘rtachirchiq tuman bo‘limi xodimlari A. Usmonov, S. Islomiddinov va A. Nazirqulovlarining qonuniy faoliyatiga faol qarshilik ko‘rsatib, ularni qanday shaklda bo‘lmasin o‘z xizmat vazifasini bajarishdan voz kechishga, shuningdek qonunga xilof harakatlar sodir etishga majbur qilish uchun ularni, shuningdek odil sudlov va boshqaruv tizimining boshqa xodimlarining shaxsiyatiga tegadigan so‘zlar bilan haqoratlab, uni sudning ijro hujjatlari tanishtirayotgan S. Islomiddinovning qo‘lidan ijro ishini tortib olib, yirta boshlaydi va o‘z harakatlari bilan voqea joyida bo‘lgan jamoatchilik vakillari oldida hokimiyat vakillarining sha’ni, qadr-qimmatini yerga urib, ularni obro‘sizlantirgan.

A. Ro‘ziboyevning o‘z xizmat vazifalarini bajarayotgan hokimiyat vakillarining harakatlariga faol qarshilik ko‘rsatish, ularning o‘z xizmat vazifalarini bajarishdan voz kechishga va qonunga xilof harakatlar sodir etishga majbur qilish, bu borada rasmiy hujjatni noqonuniy ravishda egallash va nobud qilishga urinishda ifodalangan jinoiy harakatlari natijasida korxonalar, muassasalar, tashkilotlarning qat’iy hisobidagi rasmiy hujjat ya’ni, fuqarolik ishlari bo‘yicha O‘rtachirchiq tumanlararo sudning 2020 yil 20 martdagi hal qiluv qarori asosida O‘zbekiston Respublikasi Bosh prokuraturasi huzuridagi majburiy ijro byurosi O‘rtachirchiq tuman bo‘limi tomonidan yuritilgan 11853/1-sonli ijro ishi hujjatlariga jiddiy shikast yetkazgan.

A. Ro‘ziboyev o‘z jinoiy harakatlarini davom ettirib, korxona, muassasa, tashkilotlarning qat’iy hisobidagi rasmiy hujjat sanalgan ijro hujjatini uning qo‘lidan qaytarib olmoqchi bo‘lgan hokimiyat vakillari, MIB O‘rtachirchiq tuman bo‘limi xodimlarining o‘z xizmat vazifasini bajarishlariga faol qarshilik ko‘rsatib, ularni qanday shaklda bo‘lmasin o‘z xizmat vazifasini bajarishdan voz kechishga majbur qilish maqsadida O‘zbekiston Respublikasi Bosh prokuraturasi huzuridagi majburiy ijro byurosi O‘rtachirchiq tuman bo‘limi bo‘lim boshlig‘i o‘rinbosari A. Usmonovning boshiga va tanasining turli joylariga urishga harakat qilib, voqea joyida bo‘lgan jamoatchilik vakillari ko‘z o‘ngida hokimiyat vakillari va odil sudlovning sha’ni, qadr-qimmatini yerga uruvchi so‘zlarni aytib, hal qiluv qarori qabul qilgan sud uning uyiga kelishi lozimligi, bunga qadar esa A. Usmonovni uyida garov tariqasida ushlab turishini bildirib, hokimiyat vakilining erkinligiga tajavuz qiladi.

So‘ngra, uyida tashkil etgan avtomashinalarga xizmat ko‘rsatish shaxobchasidan temir armatura olib, undan qurol sifatida foydalanib ushbu armatura bilan A. Ro‘ziboyevning noqonuniy harakatlarini oldini olishga harakat qilayotgan hokimiyat vakillari S. Islomidinov va A. Nazirqulovlarga xamla qilib, A. Nazirqulovning oyog‘iga ushbu temir armatura bilan urib, o‘z qo‘lidan qochib chiqqan A. Usmonovning o‘rniga A. Nazirqulovni uyiga olib kirishga harakat qila boshlaydi.

MIB O‘rtachirchiq tuman bo‘limi xodimlari jamoatchilik ko‘z o‘ngida hokimiyat vakillari va boshqaruv tizimining boshqa xodimlarining sha’ni va qadr qimmatini saqlab qolish uchun voqea joyidan ketishga majbur bo‘lgan.

Ushbu jinoyat ishi 2020 yil 30 iyun kuni jinoyat ishlar bo‘yicha O‘rtachirchiq tuman sudining ish yurituviga kelib tushgan bo‘lib, qonunda belgilangan tartibda ko‘rib chiqiladi", deyiladi ma’lumotda.