“Jon” to‘foni: Meksikada 22 kishi halok bo‘ldi

“Jon” to‘foni bir haftadan beri Meksikaning janubi-g‘arbiy qismidagi Tinch okeani sohillariga urmoqda. Tabiat hodisasi ta’siridan 22 kishi halok bo‘ldi. Bu haqda The Guardian nashri xabar berdi.

Suv bosgan uylardan aholi evakuasiya qilinmoqda. Meksikaning eng qashshoq shtatlaridan biri Gerreroda 18 kishi halok bo‘ldi. Ko‘chki ko‘plab uylarni vayron qilgan. Mahalliy matbuotning xabar berishicha, Oaxakada uch kishi, shimoliy Michoakan shtatida bir bola daryoga cho‘kib ketgan.

“Jon” to‘foni Gerreroga yetib keldi. Hafta davomida tayfun qirg‘oq bo‘ylab harakatlanib, kuchli yomg‘ir va toshqinlarni keltirib chiqardi.

Qayiq va serfing taxtalari yordamida suv bosgan hududlarni evakuasiya qilayotgan aholi hukumatga yordam so‘rab murojaat qildi. Chunki shahar hozir 2023 yildagi dahshatli bo‘rondan o‘zini tiklayapti, biroq bir yildan kamroq vaqt ichida mamlakat ikkinchi marta ofatga uchradi.

O‘tgan oktyabr oyida “Otis” to‘foni Akapulkoga 5-toifali dovul sifatida kelib, qirg‘oq yaqinida tezda kuchayib, 50 dan ortiq odamning hayotiga zomin bo‘lgan edi va milliardlab dollar zarar keltirgan. Ammo “Jon”ning yog‘ingarchilik darajasi Otis to‘fonidan uch baravar ko‘p.

Meteorologlarning ta’kidlashicha, okean haroratining ko‘tarilishi dovullarni kuchliroq qiladi va ularning tezroq o‘sishiga imkon beradi.