Isroil va Falastin urushi: 34 nafar falastinlik va 2 nafar isroillik bola halok bo‘ldi
Isroil va Falastinning XAMAS guruhi o‘rtasidagi ziddiyat G‘azo sektorida 34 va Isroilda ikki bolaning umriga zomin bo‘ldi. Bu haqda YUNISEFning Yaqin Sharq va Shimoliy Afrika bo‘yicha vakili Juliyet Tuma ma’lum qildi, deb xabar beradi "RIA Novosti".
"YUNISEFga kelgan xabarlarga ko‘ra, 10 maydan beri G‘azo sektorida 34 bola o‘ldirilgan. Shunday qilib, o‘tgan to‘rt kun ichida 34 nafar falastinlik bola o‘ldirildi, bu juda katta raqam. Shuningdek, Isroilda ikki bola vafot etdi”, dedi Tuma.
Bundan tashqari, 14 may kuni G‘azo sektoridagi 35 ta maktab va Isroildagi uchta maktab zarar ko‘rdi, deb yozadi YUNICEF tvitterdagi sahifasida.
Eslatib o‘tamiz, Isroil hukumatining Quddusdagi bir necha arab oilalarini uylaridan haydab chiqarish to‘g‘risidagi qarori va undan keyingi namoyishlar ortidan 10 may kuni Isroil va XAMAS o‘rtasida qurolli to‘qnashuv boshlandi. 10 may kuni guruh Isroil hududiga qator raketa hujumlarini uyushtirdi. Bunga javoban, ID G‘azo sektorini o‘qqa tutishni boshladi.