Endi ko‘cha va bozorlardagi tartibsiz savdoga chek qo‘yiladi

Edi ko‘chalarda ruxsatsiz kichik do‘konlar ochib, tartibsiz savdo qilayotganlar faoliyati to‘xtatiladi hamda noqonuniy qurilgan tadbirkorlik ob’ektlari buzib tashlanadi.

Bu boradagi yangi tartib Hukumatning 478-son qarorida belgilab qo‘yildi.

Joriy yil 1 oktyabrdan boshlab umumiy ovqatlanish, savdo va xizmat ko‘rsatish sohasidagi tadbirkorlik sub’ektlari uchun o‘ziga tegishli bino va inshootlarga hamda yer uchastkalariga tutash bo‘lgan, davlat organlari va tashkilotlariga doimiy foydalanishga berilgan aholi punktlarining umumiy foydalanishdagi yer uchastkalaridan (sog‘liqni saqlash, ta’lim va maktabgacha ta’lim tashkilotlariga tegishli yer uchastkalari bundan mustasno) mavsumiy umumiy ovqatlanish, savdo va xizmat ko‘rsatish faoliyatini (keyingi o‘rinlarda — tijorat faoliyati) amalga oshirish uchun haq evaziga ijara huquqi asosida foydalanish tizimi amaliyotga joriy etiladi.

Hujjatga muvofiq, mahalliy hokimliklar, jumladan, Qoraqalpog‘iston Respublikasi Vazirlar Kengashi Soliq qo‘mitasi, Kadastr agentligi, Qurilish va uy-joy kommunal xo‘jaligi vazirligi hamda Ichki ishlar vazirligi bilan birgalikda o‘ziga tegishli bo‘lmagan yer uchastkasida norasmiy tarzda tijorat faoliyatini amalga oshirayotgan tadbirkorlik sub’ektlarining ro‘yxatini va ular to‘g‘risidagi ma’lumotlarni (joylashgan joyi, faoliyat turi, egallangan yer maydoni) quyidagi bosqichlarda xatlovdan o‘tkazishlari lozim:

• birinchi bosqich — barcha tuman (shahar)lardagi markaziy ko‘chalarda 2025 yil 1 sentyabrga qadar;
• ikkinchi bosqich — qolgan ko‘chalarda 2025 yil 1 oktyabrga qadar.

Mahalliy hokimliklar manfaatdor davlat organlari va boshqa tashkilotlar bilan birgalikda 2025 yil 1 oktyabrdan boshlab xatlov natijasida aniqlangan ob’ektlarning mazkur qarorda belgilangan tartibda qonuniy faoliyat yuritishi yoki hududning bo‘shatilishini ta’minlaydi.

Bunda joylashtirish sxemasiga muvofiq bo‘lgan tijorat faoliyati ob’ektlari «dizayn-kod»ga asosan loyihalar tasdiqlangunga (2026 yil 1 fevral) qadar ushbu bandga ko‘ra faoliyati qonuniylashtirilib, ijara shartnomasi tuzilgan ob’ektlarda tadbirkorlar tomonidan har qanday qo‘shimcha qurilishlar, maydon, fasad va mavjud yengil konstruksiyalarning konstruktiv elementlarini o‘zgartirishga yo‘l qo‘yilmaydi, shunday ishlar amalga oshirilgan taqdirda, tutash maydonda joylashgan ob’ektlar belgilangan tartibda buziladi hamda yangi shartnoma tuzilmaydi.

2025 yil 1 oktyabrdan boshlab esa har yili 1 yanvarga qadar tuman (shahar) qurilish va uy-joy kommunal xo‘jaligi, kadastr, soliq idoralari takliflari asosida, tuman (shahar) hokimlarining qarori bilan kelgusi yil uchun tuman (shahar) hududidagi aholi punktlarining umumiy foydalanishdagi yer uchastkalarida tijorat faoliyati ob’ektlarini joylashtirish sxemasi tasdiqlanadi.

Nizom, shuningdek, Mazkur Nizom ko‘p qavatli binolardagi (uylardagi) noturar joylarda tijorat faoliyatini amalga oshirayotgan tadbirkorlik sub’ektlari tomonidan qo‘shimcha yengil qurilmalarni qurish bilan bog‘liq munosabatlarga ham tatbiq etiladi.