Eldor Aripov: O‘zbekiston Prezidentining XXRga davlat tashrifi yakunlari bo‘yicha erishilgan barcha kelishuvlar mamlakatlarimiz aholisi farovonligini oshirishga qaratilgan

Kecha Toshkentda O‘zbekiston Prezidentining XXRga davlat tashrifi yakunlariga bag‘ishlangan «O‘zbekiston va Xitoy: ikki mamlakat xalqlari farovonligi yo‘lida o‘zaro manfaatli hamkorlikni rivojlantirish» mavzusida xalqaro konferensiya bo‘lib o‘tdi, deb xabar bermoqda «Dunyo» AA muxbiri.

Markaziy Osiyo xalqaro instituti Xitoy elchixonasi bilan birgalikda SMTI va ikki davlat savdo-sanoat palatalari hamkorligida tashkil etilgan anjumanda O‘zbekiston va Xitoyning yetakchi ilmiy-tadqiqot institutlari rahbarlari, ekspertlari hamda mamlakatimizdagi Xitoy kompaniyalari vakillari ishtirok etdi.

O‘zbekiston Prezidenti huzuridagi Strategik va mintaqalararo tadqiqotlar instituti (SMTI) direktori Eldor Aripov «Barcha sharoitlarda har tomonlama strategik sheriklik: O‘zbekiston va Xitoy o‘rtasidagi munosabatlarda yangi bosqich» mavzusidagi panel sessiyasida ma’ruzachi sifatida ishtirok etdi.

Ekspert o‘z ma’ruzasida ikki davlat rahbarlari sammitining muhim natijalarini tahlil qildi.

Eldor Aripov O‘zbekiston Prezidentining davlat tashrifi yuqori samaradorligi haqida gapirar ekan, bir qancha asosiy jihatlarga alohida to‘xtalib o‘tdi.

Birinchidan, SMTI direktorining so‘zlariga ko‘ra, O‘zbekiston-Xitoy munosabatlari yangi davrda barcha sharoitlarda har tomonlama strategik sheriklik darajasiga ko‘tarilgani tashrifning muhim voqeasi bo‘ldi.

«O‘tgan vaqt ichida biz juda uzoq yo‘lni bosib o‘tdik. Biz ikki tomonlama hamkorlik uchun uch yuzga yaqin hujjatdan iborat juda mustahkam shartnomaviy-huquqiy asosni shakllantirdik», — dedi ekspert.

Bundan tashqari, uning fikricha, hukumatlararo, parlamentlararo va idoralararo darajada faol siyosiy muloqot yo‘lga qo‘yilgan.

Qo‘shma bayonotning qabul qilinishi bilan munosabatlar shu qadar yuqori siyosiy ishonch darajasiga ko‘tarildiki, ular xalqaro vaziyat dinamikasidan qat’i nazar, barqaror bo‘lib qoladi.

Ikkinchidan, ikki davlat rahbarlarining sammiti O‘zbekiston-Xitoy munosabatlari o‘zaro manfaatdorlik tamoyiliga asoslanishini tasdiqladi.

Eldor Aripov ta’kidlaganidek, «Bizning kun tartibimiz har qanday geosiyosiy vaziyatdan tashqarida bo‘lib, sof pragmatik kontekstga ega».

Oliy darajadagi muzokaralar yakunlari bo‘yicha erishilgan barcha kelishuv va shartnomalar aniq natijalarni ko‘zlab, ijtimoiy-iqtisodiy muammolarni hal etish va aholi farovonligini oshirishga qaratilgan. Xususan, ushbu hujjatlarda O‘zbekiston qishloq xo‘jaligi mahsulotlari importini kengaytirish, suvni tejaydigan texnologiyalarni joriy etish, kambag‘allikni qisqartirish sohasida kadrlar tayyorlash va boshqa ko‘plab masalalar ko‘zda tutilgan.

Shu nuqtai nazardan, ular asosan Prezident Shavkat Mirziyoyev tomonidan Yangi O‘zbekiston qurilishi doirasida olib borilayotgan islohotlarni qo‘llab-quvvatlashga qaratilgan.

Uchinchidan, tashrif ikki davlat o‘rtasida tamoman yangi yo‘nalishlarda hamkorlik yo‘lga qo‘yilganini ko‘rsatdi.

Shu tariqa, oliy darajadagi muzokaralar natijasida elektron tijorat sohasida hamkorlikni faollashtirish bo‘yicha kelishuvga erishildi.

Eldor Aripovning aytishicha, 2022 yilda Xitoyda onlayn savdolar hajmi qariyb 2 trillion dollarni tashkil etdi. Bu bozorni ishlab chiqaruvchilarimiz tomonidan o‘zlashtirilishi ularga Xitoy bozorini egallashda ulkan imkoniyatlar eshigini ochadi. Shuningdek, O‘zbekiston iqtisodiyotining ko‘plab tarmoqlarini rivojlantirishga kuchli turtki beradi.

Ikki mamlakat o‘rtasidagi hamkorlikning yangi istiqbolli yo‘nalishlari — bu elektromobillar sohasidagi hamkorlikdir.

O‘zbekistonda oxirgi uch yil ichida ushbu transport vositalari sotuvi 10 barobar oshdi. Xitoyning jami avtomobil importidagi ulushi 36 foizdan 80 foizga oshdi.

Davlat tashrifi chog‘ida Prezident Shavkat Mirziyoyev va «BYD» kompaniyasi rahbari hamkorlikda Jizzax viloyatida elektromobillar va gibrid avtomobillarni yig‘ish loyihasini ishga tushirgani mamnuniyat bilan ta’kidlandi. Shunisi e’tiborga loyiqki, bu «BYD» kompaniyasining Xitoydan tashqaridagi birinchi qo‘shma qo‘shma korxonasi bo‘ladi.

To‘rtinchidan, Urumchi shahrida bo‘lib o‘tgan mintaqalararo forumi yakunlari bo‘yicha O‘zbekiston va Xitoy hududlari kengashi tuzildi.

«Bu mintaqalar o‘rtasidagi o‘zaro aloqalarni forumdan forumga emas, balki doimiy ravishda saqlab qolish imkonini beradigan juda muhim qadamdir. Ikki mamlakat hududlari o‘rtasidagi to‘g‘ridan-to‘g‘ri aloqalar, mohiyatan barcha sohalardagi hamkorlikni amalga oshirishni ta’minlaydigan mustahkam bog‘lovchi mexanizmlar vazifasini o‘taydi», — deya qayd etdi SMTI rahbari.