Dubayga fohishalik uchun ayol sotganlarga hukm o‘qildi
Bir fuqaro (ayol) Bektemir tuman IIO FMB boshlig‘iga ariza bilan murojaat qiladi. O‘z arizasida ikki nafar ayol uni aldab, Dubayga fohishalik bilan shug‘ullanish uchun yuborayotganligini ma’lum qilgan...
Gap shundaki, uch nafar ayol bir guruh bo‘lib arizachiga Dubaydagi mehmonxonalarda fohishalik bilan shug‘ullanish orqali moddiy mablag‘ orttirishlikni taklif qilishadi. Fuqaro ularni taklifiga rozilik bergunga qadar esa uchib ketish hujjatlarini tayyorlab qo‘yadi. Arizachidan foydalanish maqsadida ya’ni, uni yollash – fohishalik bilan shug‘ullanishi uchun Dubayga yuborayotgan vaqtlarida Toshkent halqaro aeroportida tezkor tadbir davomida qo‘lga olingan.
Ayollardan ikki nafari 49 yoshni qoralagan, uchinchisi esa 69 yosh. Har biri ikki nafar farzandning onasi. Eng hayratlanarlisi shundaki, 49 yoshli ayollardan biri muqaddam qo‘shmachilik qilish yoki fohishaxona saqlash jinoyatini sodir qilib sudlangan. Xulosa qilib, to‘g‘ri yo‘ldan yurish o‘rniga yana boshi berk ko‘chani tanlagani kishini o‘yga toldiradi.
“Nima qilishimni bilmay, Bektemir tuman IIO FMBga bordim...”
Sud majlisida har uchchalasi aybiga qisman iqrorlik bildirdi. So‘roq qilingan jabrlanuvchi esa quyidagilarni ma’lum qildi...
— Qizimning operasiyasi uchun order olti oydan so‘ng berilishini bilgach, uyga yig‘lab ketayotgan vaqtimda uch yildan buyon tanish bo‘lib qolgan 49 yoshli ayolni ko‘rib qoldim. Salomlashganimda ko‘nglim buzulganini sezib, nimadan hafa ekanimni so‘radi. “Qizimning operasiyasi uchun pul kerak. Tayinli joyda ishlamasam, biror tanishingiz bo‘lsa ishga joylashishimda ko‘mak bering”, dedim. Shunda u egizak opasining tanishi borligini, u Dubaydagi mehmonxonada O‘zbekistondan borgan yosh qizlarni fohishalik bilan ishlatishini aytdi. Agar xohlasam shu tanishi orqali meni Dubayga yuborishini va yaxshigina daromad topishim mumkinligini bildirib, roziligimni so‘radi. Qizimning operasiyasi uchun pul juda zarurligi bois fohishalik bilan shug‘ullanishga ham rozi ekanimni ma’lum qildim. Shu kuniyoq tanishimning opasi qo‘ng‘iroq qildi. Hujjatlarni o‘zlari tayyorlashini va Dubayga borish uchun ketadigan xarajatlarni to‘lamasligimni aytdi. Bir oyda 1000 AQSh dollari atrofida pul topishimni, faqat ish topib berishgani uchun ularga har oyda 250 AQSh dollari berib turishimni bildirishdi. Gaplarini eshitib, “o‘ylab ko‘raman”, dedim.
Shu kuni opa-singillarning tanishi qo‘ng‘iroq qildi. 69 yoshli bu ayol meni Dubayga o‘zi jo‘natishini, ish bilan ta’minlashini va mijozlarga qanday “xizmat ko‘rsatishim”ni tushuntirdi. Uyimga esa egizak opa-singillarning kichigi kelib, chet elga chiqishga ruxsat beruvchi pasportimni unga berishimni, Dubayda deportim bor yoki yo‘qligini tekshirishini aytdi. Shu sababli unga pasportimni berdim, ketdi.
Ertasi kuni 69 yoshli ayol qo‘ng‘iroq qilib, deport aniqlanmaganini, Dubayga uchib ketishim uchun samalyotga chipta olganini va sug‘urta hujjatlarini ham tayyorlab qo‘yganini aytdi. Gaplarini eshitib, “qanday qilib, rozilik bildirmasimdan avval hujjatlarimni rasmiylashtirdingiz?” deya so‘raganimda ayol “rozilik ham kutib o‘tirmaymiz, buni o‘yin deb o‘ylasangiz xato qilasiz. Uchishga tayyor turing”, deganida jaxlim chiqib telefonni o‘chirib ko‘ydim. Ayolning gaplarini tekshirish maqsadida opa-singilga qo‘ng‘iroq qilganimda tasdiqlashdi. Ulardan biri agarda Dubayga ketadigan bo‘lsam, ketgunimga qadar pasportim ularda turishini aytganida jaxlim chiqib, ularni haqoratladim. Jahl ustida ularning oldiga yo‘l oldim. Ketayotgan vaqtimda o‘yin qilishayotganligini bilib, opa-singillar bilan o‘rtamizda bo‘ladigan suhbatni yozib olish uchun diktafon yoqib qo‘ydim. Hujjatlarni rasmiylashtirish uchun ma’lum miqdorda pul sarflashganini, endilikda ushbu pullarni to‘lab berishim kerakligini aytishdi. Ertasi kuni yana ularning oldiga bordim, pasportimni qaytarib berishdi.
So‘ng opa-singillar tinmay qo‘ng‘iroq qila boshlashdi. Kechga yaqin qo‘ng‘iroqqa javob bergan vaqtimda gaplashib olishni taklif qilishdi. Oldilariga ketayotgan vaqtimda suhbatni yozib olish uchun diktafonni yoqib oldim. Nima sababdan Dubayga borib fohishalik bilan shug‘ullanishdan bosh tortayotganimni, hujjatlar rasmiylashtirilgani, borib pul ishlab kelishimni aytishdi. Agarda Dubayda ular uchun fohishalik bilan shug‘ullanmasam, Toshkentda opa-singillarning qo‘lida fohishalik qilib, pullarni to‘lab berishimni aytishdi...
Oradan bir necha kun o‘tib, 69 yoshli ayol qo‘ng‘iroq qilib, tibbiy tekshiruvlardan o‘tishim uchun egizak opaga pul jo‘natganini, barcha tibbiy tekshiruvlardan o‘tib Dubayga ketishga tayyor turishimni aytdi. Nima qilishimni bilmay, Bektemir tuman IIO FMBga bordim...
Tezkor tadbirga ko‘ra, egizak opa bilan uchrashish uchun Toshkent xalqaro aeroportiga bordim. O‘sha yerda koronavirus tekshiruvlaridan o‘tdim, haqini egizak opa yonidan to‘ladi, xayrlashib ketdik. Shu kuni yana qo‘ng‘iroq qilib, bir mijozga “xizmat ko‘rsatib”, unga pul ishlab ketishim kerakligini aytdi. Uning uyiga borganimda notanish erkak spirtli ichimlik ichib o‘tirganini ko‘rdim. Ularning oldiga kirishdan avval diktafonimni yoqib qo‘ydim. Egizak opa va notanish erkak Dubayda qanday ishlash kerakligi, agarda aytilgan ishlarni qilmasam o‘zimga yomon bo‘lishini do‘q qilib tushuntirishdi. Mendan Dubayga fohishalik bilan shug‘ullanish uchun emas, balki do‘konda sotuvchilik qilish uchun ketayotganim to‘g‘risida tilxat yozib berishimni so‘radi, IIO FMBga bergan arizam yuzasidan holatlar tekshirilayotgani ma’lum bo‘lib qolmasligini oldini olish uchun tilxat yozib berdim. Ular sarflagan pullarni Dubayda “ishlab” qoplamagunimga qadar belgilangan xonadan chiqmasligim va topgan pulimni qo‘limga olmasligini aytishdi. Ertasi kuni tongda egizak opa bilan birga Toshkent xalqaro aeroportiga bordim. Shunga qadar egizak singil telefonda aloqada bo‘lib, qayerda ekanim, nimalar bilan shug‘ullanayotganimni bilib turishdi. Shu tariqa tazkor tadbir davomida ular qo‘lga olindi.
SUD HUKM QILDI
Egizak opaga Jinoyat kodeksining 135-moddasi (odam savdosi) 2-qismi “e” bandi bilan aybli deb topildi va JKning 57-moddasini qo‘llab, 3 yil ozodlikdan mahrum qilish jazosi tayinlandi. JKning 60-moddasiga muvofiq, jinoyat ishlari bo‘yicha Bektemir tuman sudining 2020 yildagi hukmiga ko‘ra, JKning 131-moddasi (qo‘shmachilik qilish yoki fohishaxona saqlash) 2-qismi bilan tayinlangan ozodlikni cheklash jazosining o‘talmay qolgan ozodlikni cheklash jazosini qisman qo‘shish yo‘li bilan unga 3 yil 1 oy muddatga ozodlikdan maxrum qilish jazosi tayinlandi. Sudlanuvchi sud zalidan qamoqqa olindi.
Egizak opaga esa 3 yil ozodlikdan mahrum qilish jazosi tayinlandi, sud zalidan qamoqqa olindi.
69 yoshni qarshi olgan sudlanuvchiga esa 4 yil ozodlikni cheklash jazosi tayinlandi.
Umidjon Xakimov,
jinoyat ishlari bo‘yicha
Bektemir tuman sudi sudyasi
