Buxoroda erini pichoqlagan ayolga hukm o‘qildi
2022 yil 25 may kuni jinoyat ishlari bo‘yicha Peshku tuman sudi tomonidan sudlanuvchi Ziyoyeva Farangis Halim qiziga nisbatan O‘zbekiston Respublikasi JK 104-moddasi 2-qismining “l” bandi bilan hukm o‘qildi.
Ish tafsilotlari ko‘ra, F.Ziyoyeva 2022 yil 16 yanvar kuni soat 17:30da Peshku tuman, Ibn-sino mahalla fuqarolar yig‘ini Afshona qishlog‘ida joylashgan ijaradagi yashash xonadonida turmush o‘rtog‘i Jonpo‘lotov Nozim Namoz o‘g‘li bilan o‘zaro kelishmovchilik natijasida janjallashib qolib, janjal vaqtida oshxona pichog‘i bilan N.Jonpo‘lotovni qorin qismiga bir marotaba urib, sud-tibbiy ekspertizasi xulosasiga ko‘ra, unga og‘ir tan jarohati yetkazib, qurol sifatida foydalanilishi mumkin bo‘lgan ashyoni ishlatib qasddan badanga og‘ir shikast yetkazish jinoyatini sodir etgan.
Sudda so‘roq qilingan jabrlanuvchi N.Jonpo‘lotov sudlanuvchi Ziyoyeva Farangis Halim qizi uning turmush o‘rtog‘i ekanligini, ularning o‘rtalarida bo‘lib o‘tgan oilaviy kelishmovchiliklar sababli turmush o‘rtog‘i F.Ziyoyeva Peshku tumani, Ibn-Sino MFY, Afshona qishlog‘ida joylashgan uyga ijaraga chiqib alohida yashab kelganligini, 2022 yil 16 yanvar kuni o‘zining uyida ukasining nikoh to‘yidan keyingi marosimi bo‘lganligini, ushbu marosimda u ham ishtirok etib mehmonlar va qarindoshlar bilan birga o‘tirib ozgina spirtli ichimlik iste’mol qilganligini, taxminan soat 16:00da turmush o‘rtog‘i F.Ziyoyeva unga qo‘ng‘iroq qilib och qolganligini, ovqat olib kelishni aytganligi sababli u bir idishga osh va shirinlik olib, turmush o‘rtog‘i F.Ziyoyevani ijaradagi uyiga borganligini, u yerda F.Ziyoyeva bilan ko‘rishib, olib kelgan ovqatini berganligini, shunda F.Ziyoyeva unga “olib kelgan ovqating salqut, yemayman” deb aytganidan so‘ng ular o‘zaro tortishib qolishganini, F.Ziyoyeva opasi Latofatning uyiga ketishini aytib ko‘cha tomonga chiqib ketayotgan vaqtida, uning qo‘lidan tortib uy ichkarisiga kiritganligini va yuzidan ikki marotaba urganligini, shunda ketaman deb yana baqir-chaqir qilganligini, bir ozdan keyin turmush o‘rtog‘i F.Ziyoyeva bir qo‘lida kiyim-kechaklari va ikkinchi qo‘lida pichoq bilan chiqqanligini, turmush o‘rtog‘i F.Ziyoyevaning uydan chiqishiga qo‘ymasdan ichkariga kirishini aytib qo‘lidan tortganligini, shu vaqtda turmush o‘rtog‘i F.Ziyoyeva qo‘lidagi pichoqni uning qorniga suqqanligini, shunda u nima sababdan uni pichoqlaganini so‘rab qo‘li bilan F.Ziyoyevaning bo‘ynidan bug‘ganligini, keyin qorniga suqilib qolgan pichoqni tortib olganligini, pichoq suqilgan joydan to‘xtamasdan qon ketganligi sababli ijaradagi uyda turgan velosipedni olib o‘zining uyiga borganligini, keyin ukasi Jonpo‘lotov Nasimga telefon qilib ahvoli og‘irlashayotganini aytib uni chaqirganligini, ukasi kelgancha tanishi Abbosning avtomashinasida Peshku tuman tez yordam bo‘limiga borganligini, u yerda unga tez tibbiy yordam berishganini, bundan oldin xam turmush o‘rtog‘i F.Ziyoyeva bilan o‘rtalarida oilaviy kelishmovchiliklar bo‘lganligini, 2022 yil 16 yanvar kuni turmush o‘rtog‘i F.Ziyoyevani urib tan jarohati yetkazgan vaqtida ularning oldida hech kim bo‘lmaganini, turmush o‘rtog‘i unga piqoch suqqanidan keyin ularning oldiga qo‘shnisi kelib qolib ularni ajratganligini, hozirda sudlanuvchi F.Ziyoyevaga nisbatan da’vosi yo‘qligini, F.Ziyoyevaga qonuniy yengillik berilishini so‘rab ko‘rsatuv berdi.
Sud, sudlanuvchi F.Ziyoyevaga nisbatan jazo tayinlash masalasini muhokama qilib, jinoyatni sodir etish sabablari va bunga olib kelgan shart-sharoitni, jinoyat sodir etish paytidagi va sodir etilganidan keyingi xulq-atvorini, mazkur jinoyat jabrlanuvchining zo‘rlik va boshqa g‘ayriqonuniy harakatlari tufayli sodir etilganligini inobatga olib, uning aybiga to‘liq iqrorligini, muqaddam sudlanmaganligini, qilmishidan chin ko‘ngildan pushaymonligini, qaramog‘ida bir nafar 3 yoshli voyaga yetmagan farzandi borligini, yagona boquvchiligini, jabrlanuvchi (turmush o‘rtog‘i) N.Jonpo‘lotov bilan doimiy janjal va oilaviy kelishmovchilik sababli hozirda “Oydin Nur” oilani ijtimoiy, huquqiy himoyalash markazida yashab kelayotganligini, jabrlanuvchining da’vosi yo‘qligini sodir etilgan jinoyatning ijtimoiy xavflilik darajasini jiddiy kamaytiruvchi holatlar deb topib unga nisbatan O‘zbekiston Respublikasi JK 104-moddasi 2-qismining “l” bandi bilan JKning 57-moddasini qo‘llab, kunning kech soat 21:00dan ertalab soat 7:00gacha yashash joyidan chiqishni cheklagan holda 5 yil ozodlikni cheklash jazosi tayinlandi.
Tursunboy Tangriyev,
Buxoro viloyat sudining jinoyat ishlari bo‘yicha sudyasi
Farrux Ikramov,
Jinoyat ishlari bo‘yicha Peshko‘ tuman sudining raisi
