BMT Termizdan Afg‘onistonga insonparvarlik yordami jo‘natdi

BMT Termizdan Afg‘onistonga insonparvarlik yordami jo‘natdi

Bugun erta tongda Birlashgan Millatlar Tashkilotining Qochqinlar bo‘yicha agentligi, BMT Qochqinlar bo‘yicha Oliy komissarligi O‘zbekiston hukumati ko‘magida Termiz shahridagi xalqaro ko‘p funksiyali transport-logistika xabi orqali Afg‘onistonga navbatdagi beg‘araz yordamini jo‘natdi.

BMT Qochqinlar bo‘yicha Oliy komissarligi mutasaddilarining ta’kidlashicha,O‘zbekiston ko‘magida qo‘shni mamlakatga 12 ta yuk mashinasiga yuklangan 48 mingdan ortiq ko‘rpa (adyol) qahraton sovuqda himoyaga muhtoj afg‘on xalqining hayotini saqlab qolishda muhim o‘rin tutadi.

BMT Termizdan Afg‘onistonga insonparvarlik yordami jo‘natdi

BMT Qochqinlar bo‘yicha Oliy komissarligining mamlakatimiz janubidagi gumanitar logistika mintaqaviy markazi O‘zbekiston –Afg‘oniston chegarasidan 2 kilometr uzoqda joylashgan. Barcha zamonaviy sharoitlarga ega markaz BMT Qochqinlar bo‘yicha Oliy komissarligiga mintaqadagi zaxiralarni zarur mahsulot bilan tez to‘ldirish va gumanitar yordam ko‘rsatishda yanada moslashuvchan bo‘lish imkoniyatini beradi. Xalqaro ko‘p funksiyali transport-logistika xabi Afg‘oniston va boshqa davlatlarga gumanitar yordamni tizimli, markazlashtirilgan va maqsadli yetkazishni ta’minlaydi.

BMT Termizdan Afg‘onistonga insonparvarlik yordami jo‘natdi

–Biz O‘zbekiston hukumati bilan jafokash afg‘on xalqiga hayotiy insonparvarlik yordami ko‘rsatishni davom ettirish uchun barcha sa’y–harakatlarni amalga oshirmoqdamiz, — deydi BMT Qochqinlar bo‘yicha Oliy komissarligi katta maslahatchisi Frenk Remus.– Hamkorlikdagi ishimiz bu yilgi sovuq qishda ham juda muhim ahamiyat kasb etayotir. Chunki, bu safargi insonparvarlik yordami Afg‘onistondagi ko‘plab himoyaga muhtoj insonlarning ko‘rpaga (adyol) bo‘lgan ehtiyojini qondiradi.

BMT Termizdan Afg‘onistonga insonparvarlik yordami jo‘natdi

Termizdagi Xalqaro ko‘p funksiyali transport-logistika xabidan foydalanish BMT Qochqinlar bo‘yicha Oliy komissarligi, boshqa xalqaro tashkilotlar hamda davlatlarning O‘zbekiston hukumati ko‘magida Afg‘onistondagi ayollar, bolalar va erkaklarning shoshilinch ehtiyojlariga tezkorlik bilan javob berishiga qulay muhit yaratdi. Shuningdek, Afg‘oniston, Eron, Pokiston hamda Markaziy Osiyo va undan tashqarida BMT Qochqinlar bo‘yicha Oliy komissarlik operasiyalariga yordam berish uchun asosiy konsolidasiya va jo‘natish punkti bo‘lib xizmat qiladi. Jumladan, so‘nggi ikki yilda markaz orqali ko‘chirilgan oilalar, suv toshqinlari va zilzila kabi tabiiy ofatlardan jabr ko‘rganlar uchun 217 ta yuk mashinasida gumanitar yordam jo‘natilgan. Bu yerdan yuborilgan yuklar muhim uy-ro‘zg‘or idishlari, yotoq to‘shaklari, brezent, chelak, ko‘rpa, zanglamaydigan po‘latdan yasalgan oshxona to‘plamlari, ko‘chma quyosh energiyasi bilan ishlaydigan LED lampa singari asosiy ehtiyoj buyumlaridan iborat.

BMT Termizdan Afg‘onistonga insonparvarlik yordami jo‘natdi

Birgina o‘tgan yili O‘zbekiston ko‘magida Afg‘onistonda mavjud 34 viloyatdagi 5 million 900 ming kishiga asosiy ehtiyoj buyumlari va moddiy ko‘mak shuningdek, huquqiy himoya va integrasiya bo‘yicha yordam bergan. 2022 yil yanvar oyida Afg‘onistonning shimoli-g‘arbiy qismida, iyunda janubi-sharqiy Afg‘oniston va sentyabr oyida Sharqiy Afg‘onistonda sodir bo‘lgan zilzilalar, Afg‘oniston va qo‘shni Pokistonda yozgi suv toshqinlaridan aziyat chekkanlarga ham o‘z vaqtida beg‘araz yordam ko‘rsatgan.

Termizdagi xalqaro ko‘p funksiyali transport-logistika xabidan beg‘araz yordam yuki ortilgan avtomashinalar karvoni "Ayritom" chegara o‘tkazish punkti orqali qo‘shni mamlakatning Mozori Sharif shahriga jo‘nab ketdi.


Matnda xatolik topsangiz, o‘sha xatoni belgilab, bizga jo‘nating (Ctrl + Enter)

Bo'limga tegishli qiziqarli xabarlar

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!