BMT Eronda inson huquqlari buzilishini tekshirish uchun missiya tuzmoqchi
Hujjatni 47 delegasiyadan 25 tasi ma’qulladi. Olti davlat, jumladan Armaniston, Xitoy va Kuba qarshi ovoz berdi, 16 davlat, jumladan O‘zbekiston betaraf qoldi.
Missiyaning vazifasi Eronda 2022 yil 16 sentyabrda boshlangan norozilik namoyishlari bilan bog‘liq inson huquqlari buzilishi bo‘yicha mustaqil tekshiruv o‘tkazishdan iborat bo‘ladi.
Missiya 2023 yil yozida bo‘lib o‘tadigan Kengashning 53-sessiyasiga o‘z faoliyati to‘g‘risida og‘zaki ma’lumot taqdim etishi kerak.
Avvalroq Eronda namoyishlar chog‘ida qo‘lga olingan erkak va ayollar mahalliy qamoqxonalarda jinsiy zo‘ravonlik va qiynoqlarga uchragani xabar qilingan edi.
Qayd etilishicha, mahbuslarga nisbatan jinsiy zo‘ravonlik haqidagi xabarlarning aksariyati Eron g‘arbidan kelgan, bu yerda aholining asosiy qismini kurdlar tashkil qiladi. Ayni paytda CNN kamida 11 ta shunday holatdan xabardor. Ba’zi hollarda, qamoqxona rasmiylari namoyishchilarning oilalarini shantaj qilish uchun jinsiy zo‘ravonlik harakatlarini videotasvirga olishgan.
Erondagi ommaviy norozilik namoyishlari 16 sentyabr kuni, 22 yoshli Mahsa Aminiy o‘limidan keyin boshlangan edi. Rasmiy ma’lumotlarga ko‘ra, u ro‘molni noto‘g‘ri o‘ragani uchun polisiya tomonidan ushlangan va so‘roq paytida yurak xurujidan vafot etgan. Biroq, ijtimoiy tarmoqlarda uning polisiya xodimlari tomonidan kaltaklanganidan keyin o‘lgani haqida xabarlar tarqalgan.
