Bangladeshda 201 gumbazli masjid quriladi

Bangladeshning Tangayl tumanida yirik masjid qurilishi nihoyasiga etmoqda. Dakkxin Patxaliya qishlog‘ida barpo etilayotgan masjidning o‘ziga xosligi shundaki, uning 201 ta gumbazi bor. 

Ushbu masjid borasidagi tashabbusni Bangladesh Bank xodimlari federasiyasining sobiq prezidenti Rafiqul Islom ko‘targan edi. Bunga esa qishloqdagi masjidga jamoatning sig‘may qolgani sabab bo‘ldi, qishloqdagilar tashabbusni qo‘llab-quvvatladi.  Qurilish ishlari 2013 yilning yanvarida boshlandi va birinchi g‘ishtni Rafiqul Islomning onasi Riziya Xotun qo‘yib bergan edi. Hozirga kelib qurilish ishlarining 75 foizi yakunlangan. 

“Dunyoda chiroyli va katta masjidlar ko‘p, biroq bizning masjidning farqi shuki, unda 201 ta gumbaz bor. Bilishimizcha, dunyoning hech bir masjidida gumbazlar bunchalik ko‘p emas”, – deydi Rafiqul Islomning ukasi Abdul Qodir. 

Qurilishi tugagandan keyin Dakkxin Patxaliya masjidida bir paytning o‘zida 15 ming kishi namoz o‘qishi mumkin bo‘ladi.