Talabalar o‘qishini ko‘chirishning yangi tartibi tasdiqlandi

Hukumatning 299-son qarori bilan “Xorijiy va nodavlat oliy ta’lim tashkilotlaridan talabalar o‘qishini davlat oliy ta’lim tashkilotlariga ko‘chirish bo‘yicha davlat xizmatini ko‘rsatish”ning ma’muriy reglamenti tasdiqlandi.

Reglamentga ko‘ra, mazkur yo‘nalishdagi vakolatli davlat organi sifatida Bilim va malakalarni baholash agentligi belgilangan.

Talabalar har yili 15 iyuldan 5 avgustga qadar Yagona interaktiv davlat xizmatlari portali, Agentlikning maxsus elektron platformasi yoki davlat xizmatlari markazlari orqali ariza topshirishi mumkin.

Hujjatga muvofiq, arizani rad etish uchun bir qator asoslar belgilangan. Jumladan, zarur hujjatlar yoki ma’lumotlar to‘liq taqdim etilmagan bo‘lsa, noto‘g‘ri yoki buzib ko‘rsatilgan ma’lumotlar aniqlansa hamda belgilangan to‘lov o‘z vaqtida amalga oshirilmagan bo‘lsa, ariza qabul qilinmaydi.

Ariza va unga ilova qilingan hujjatlar har yili 15 iyuldan 6 avgustga qadar ko‘rib chiqiladi. Shundan so‘ng arizani qabul qilish yoki rad etish haqida qaror qabul qilinadi.

Qabul qilingan qaror to‘g‘risida ariza beruvchiga YAIDXP yoki maxsus elektron platforma orqali xabarnoma yuboriladi.

Shuningdek, o‘qishni ko‘chirish bo‘yicha o‘tkazilgan imtihon natijalari QR-kodli shaklda rasmiylashtirilib, imtihonlar yakunlanganidan keyin bir hafta ichida talabalarga taqdim etiladi.