AQSh va Germaniya Kiyevni majburlamoqchi
![AQSh va Germaniya Kiyevni majburlamoqchi AQSh va Germaniya Kiyevni majburlamoqchi](/photos/news/Q3jUMpN8gwj33go.jpeg)
AQSh va Germaniya rasmiylari Ukraina prezidenti Vladimir Zelenskiyni Rossiya bilan muzokaralar boshlashga majburlamoqchi, deb yozadi harbiy kuzatuvchi Julian Ryopke Bild nashridagi maqolasida Germaniya hukumati doiralaridagi yagona manbaga tayanib. Tabloid to‘g‘ridan-to‘g‘ri dalillarni e’lon qilmadi.
Ukrainaga eng yirik harbiy yordam donorlari bo‘lgan AQSh va Germaniyaning rejasiga ko‘ra, Kiyev “suverenitet va hududiy yaxlitlik”ni Kreml bilan muhokama qilish uchun muzokaralarga “strategik jihatdan foydali muzokaralar pozisiyasida” yondashishi kerak, deb da’vo qilmoqda Bild.
Berlin va Vashington Zelenskiyni muzokaralar zarurligiga to‘g‘ridan-to‘g‘ri ishontirish niyatida emas, aksincha, qurol-yarog‘ yetkazib berishdan tayanch sifatida foydalanib, uni bunga rozi bo‘lishga majburlashni rejalashtirmoqda, deya ta’kidlaydi Bild. Nashrning yozishicha, ittifoqchilar Kiyevga Ukraina armiyasiga hozirgi frontni ushlab turish imkonini beradigan, ammo Rossiya tomonidan bosib olingan hududlarni ozod etmaydigan miqdorda qurol yetkazib berish niyatida.
Nashr suhbatdoshining so‘zlariga ko‘ra, Germaniya mudofaa vaziri Boris Pistorius bunday taktikaga qarshi va qurol-yarog‘ yetkazib berishni qo‘llab-quvvatlaydi, biroq “qo‘llari bog‘langan”.
Germaniya hukumati vakili Bild nashriga bergan izohida "Germaniya Ukraina tomonida qat’iy ekanini" aytdi. "Federal hukumat: Ukraina Rossiya agressiyasiga qarshi mudofaa kurashida harbiy va siyosiy maqsadlarni aniq belgilashi kerak. Biz Ukrainani Rossiya agressiyasidan himoya qilish uchun zarur bo‘lgan vaqtgacha qo‘llab-quvvatlaymiz", — deb javob berdi hukumat Bild nashriga.
Nashr manbasiga ko‘ra, Germaniya va Qo‘shma Shtatlarning "B rejasi" ham mavjud bo‘lib, u hozirgi chegaralarda mojaroni muzlatishdan iborat.
Germaniya, AQSh va Ukraina hali Bild maqolasiga javob bermadi.