Andijonlik ko‘zi ojiz erkak Shavkat Mirziyoyevga murojaat yo‘lladi: "Yordam bering"

Saytimizga  Andijon viloyati, Shahrixon tumani, Qora bo‘yin MFY, Qora bo‘yin 2-ko‘cha, 74-uyda yashovchi  Zokirjon TOSHPO‘LATOVdan murojaat kelib chiqdi. Aniqrog‘i, u prezident Shavkat Mirziyoyevdan yordam so‘ragan. Saytimizda ana shu iltimosnomani chop etishga qaror qildik.

        O‘zbekiston Respublikasi Prezidentiga ochiq xat!

                      Hurmatli Shavkat Miromonovich Mirziyoyev!

  Sizning yurtimizda olib borayotgan ulkan islohotlaringiz barcha vatandoshlarim kabi mening qalbimni ham cheksiz g‘ururga to‘ldiradi.

 Sizni bunday odilona islohotlaringiz zamirida avvalo inson manfaatlarini himoya qilish, aholini ijtimoiy himoyaga olish vazifasi birinchi masalalardan ekanligi ayni haqiqatdir.

  Bugungi kunda ayrim mutasaddilar tomonidan menga nisbatan e’tibor bo‘lmaganligi uchun shaxsan sizga ochiq xat yozishga majbur bo‘ldim. Chunki, siz mamlakatimizning rahbari sifatida har bir fuqaroning murojaatiga befarq emassiz. Chunki sizning odilona islohotlaringiz amalda xalqni davlatdan rozi qilishdek ezgulikka xizmat qilmoqda. Bu esa mening qalbimda ham katta umid uyg‘otyapti. Shu sabab sizga ochiq xat yo‘llashga qaror qildim.

 Men Toshpo‘latov Zokirjon Davronbek o‘g‘li. Mening bolalikdan ko‘zlarim ojiz bo‘lib, 1-guruh nogironiman. 1994 yil Andijon viloyati, Shahrixon tumanida tug‘ilganman. Ko‘zi ojiz nogironligim sababli 2000-2012 yillarda Asaka tumanidagi 16-son maxsus ko‘zi ojizlar maktab internatida brayl’ usulida tahsil olib, maktabni a’lo baholarga bitirganman. Maktabda o‘quvchilik davrimdanoq badiiy kitoblarni mutolaa qilishga, nazmiy she’rlarni ifodali o‘qishga mehr qo‘yganman. Bundan tashqari, maktab internatida o‘tkaziladigan ma’naviy-ma’rifiy tadbirlarda faol qatnashardim. O‘zim nazmiy she’rlar mashq qilib turardim. Bu tug‘ma iste’dodimni yillar davomida mukammallashtirishga astoydil harakat qildim. Hozirda o‘z ustimda yanada ishlab, mazmunga boy she’rlar yozyapman, nazmiy yo‘nalishda erkin ijod qilyapman. Ijod namunalarim allaqachon matbuot yuzini ko‘rib ulgurgan bo‘lib, 2018 yilda “Ozor berma dilimga” nomli birinchi kitobim ham nashr qilindi. Hozirda she’rlar mashq qilish bilan birga hajviyalar, parodiyalar ham yozishga kirishganman. Qolaversa, taqlid va qo‘shiqchilik san’ati borasidagi tug‘ma iste’dodimni yanada shakllantirishga ham harakat qilyapman.

Hurmatli Shavkat Miromonovich Mirziyoyev! Sizga murojaat qilishimdan maqsadim, menga moddiy yordam emas, ma’naviy ko‘mak zarur. Shu kungacha gazeta va jurnallardagi ijod namunalarimni va she’riy to‘plamimni ham o‘z kuchim va salohiyatim bilan chop ettirdim. Avval bu borada Shahrixon tuman hokimligiga, O‘zbekiston yoshlar ittifoqi Shahrixon tuman Kengashiga va Shahrixon tuman ko‘zi ojizlar jamiyatlariga qayta-qayta murojaat qilganman. Lekin, yuqorida nomlari qayd etilgan mutasaddi tashkilotlar tomonidan hech qanday yordam ko‘rsatilmadi. Misol uchun “Mening yurtim” telekanalidagi “E’tibor markazida” hamda “Zo‘r TV” telekanalidagi “Mening orzuim” ko‘rsatuvida chiqish istagim borligini O‘zbekiston yoshlar ittifoqi Shahrixon tuman Kengashiga bildirganimda ular tomonidan hech qanday ko‘mak ko‘rsatilmadi.

  Mening yagona orzu-istaklarim, men ham sog‘lom tengdoshlarim kabi xalqimga nafim tegsa deyman. Garchi 1-guruh nogironi bo‘lsam-da xalqimga sidqidildan xizmat qilib, o‘zimdan yaxshi nom qoldirishni, ijodkor sifatida jamiyatda o‘z o‘rnim bo‘lishni  xohlayman. Hozirda ishsiz bo‘lganim tufayli imkoniyatimni hisobga olib ish bilan ta’minlab berishlarini so‘rayman.

  Qolaversa, tuman, viloyat, respublika yoshlari uchun joriy etilgan ma’naviy-ma’rifiy tadbirlarda hamda ko‘rik-tanlovlarda faol qatnashib, o‘z iste’dodimni namoyish etib borishni, men ham mutasaddilar tomonidan ma’naviy qo‘llab-quvvatlashlarini, ularning doimiy e’tiborida bo‘lishni istayman.

 

Sizga yuksak Hurmat bilan...

Zokirjon TOSHPO‘LATOV,

Andijon viloyati, Shahrixon tumani,

Qora bo‘yin MFY, Qora bo‘yin 2-ko‘cha, 74-uy.