«Manchester Siti» Abduqodir Husanov va O‘zbekiston terma jamoasini tabrikladi!

O‘zbekiston milliy terma jamoasi o‘z tarixida ilk bor Jahon chempionatiga yo‘l oldi. Shu munosabat bilan «Manchester Siti» o‘z himoyachisi Abduqodir Husanov va O‘zbekiston terma jamoasini tabrikladi!

«Manchester Siti» himoyachisi Xusanov BAAga qarshi o‘yinda har doimgidek barqaror va sodiq o‘yin namoyon etdi. Ushbu 0:0 hisobida yakunlangan uchrashuvdagi durang O‘zbekistonga kelasi yozda AQSH, Kanada va Meksikada bo‘lib o‘tadigan mundialga yo‘llanma olish uchun kifoya qildi.

Hali bor-yo‘g‘i 21 yoshda bo‘lgan yosh himoyachi uchun bu katta voqea sanaladi. U O‘zbekistonning uchlik himoya chizig‘ida yetuk va diqqatli o‘yin namoyon etdi.

"Ol-Nahyon" stadionida o‘tgan o‘yinda har ikki jamoa uchun imkoniyatlar kam bo‘ldi. BAA jamoasi Timur Kapadze shogirdlarining «ko‘k devori»ni yorib o‘ta olmadi va o‘zbeklar taktik rejaga qat’iy amal qildilar.

O‘zbekistonga bir ochko ham kifoya edi va ular shunga erishish uchun hisobni saqlab qolishlari kerak edi. G‘alaba qozongan taqdirda BAA bir ochkolik farqga yetishi mumkin edi.

Husanov va jamoadoshlari 8 daqiqa qo‘shimcha vaqtni ham bosib o‘tishdi va hakam oxir-oqibat Abu-Dabidagi bahsni tugatdi.

Mezbonlar so‘nggi daqiqalarda g‘alaba uchun bosim o‘tkazishdi, ammo ularning olti marta yo‘llagan zarbalari golga aylanmadi. O‘yin 0:0 hisobi bilan yakunlandi va O‘zbekiston termasi futbolchilari, murabbiylar, rasmiylar hamda muxlislar g‘alabani shodlik bilan qarshi olishdi. Toshkent ko‘chalarida esa bayram kecha davomida davom etishi kutilmoqda.

O‘zbekiston guruhda birinchi o‘rinni egallagan Eron bilan birgalikda jahon chempionati yo‘llanmasini qo‘lga kiritgan sakkizta jamoadan biriga aylandi.

«Oq bo‘rilar» 1998 yildan buyon Jahon chempionatiga chiqishni orzu qilib kelayotgan edi. Bu yo‘lda ko‘plab ojiz va alamli natijalar qayd etildi. Nihoyat, orzu ro‘yobga chiqdi.

O‘zbekiston terma jamoasi saralash bosqichini 10 iyun kuni Toshkentda Qatarga qarshi o‘yin bilan yakunlaydi.

Bu ulug‘vor kun munosabati bilan «Manchester Siti» jamoasi nomidan Abduqodir Husanov va butun O‘zbekiston futbol jamoasiga tabriklar yo‘llaymiz!", — deyiladi "Manchester Siti" rasmiy saytida e’lon qilingan tabrik matnida.