Ёнида номаълум аёл ҳам бўлган: Франция телеграм асосчиси Павел Дуровни нега қўлга олди?

Телеграм мессенжери асосчиси ва раҳбари Павел Дуров Францияга етиб келди, у ерда расмийлар уни ҳибсга олиш учун ордер берди. Дуров Ле Бурже аэропортида полиция томонидан қўлга олинди, дея хабар беради Франция ОАВ.

Уларнинг сўзларига кўра, Франция ҳуқуқ-тартибот идоралари Телеграмни жиноятчилик учун замин деб ҳисоблайди ва Дуровнинг контентни қатъий модерация қилишдан бош тортганидан ва гиёҳванд моддаларни тарқатиш, болалар порнографияси ва фирибгарликда гумон қилинган фойдаланувчилар ҳақидаги маълумотларни ошкор қилишда расмийлар билан ҳамкорлик қилмаганидан норози.

Деярли бир кундан буён ҳеч қандай расмий маълумот берилмаган Дуровнинг ҳибсга олиниши кескин реакция ва сўз эркинлигини чеклашда айбловларга сабаб бўлди.

Дуров, Россиядан ташқари, Франция фуқаролигига эга. Франциянинг ТФ1 телеканали манбаларига кўра, у қидирувда эканлигини билган ва Францияга боришдан қочган. Улар унинг нима учун келганини тушунишмайди ва Дубайда яшовчи Дуровнинг Европа Иттифоқига қайтишини «хато» деб аташади.

39 ёшли миллиардер Озарбайжондан шахсий самолётда учиб келган. У билан бирга тансоқчи ва исми ошкор этилмаган аёл ҳам бўлган.

Француз ОАВлари Дуров якшанба куни судья ҳузурига чиқиши кераклиги ҳақида хабар беришди.

Бироқ Блоомбергнинг Франция суд тизимидаги манбаси Дуровнинг душанба куни судга келиши ва унинг ҳибсда сақлаш муддати яна 24 соатга узайтирилиши мумкинлигини инкор этмади.

Франция қонунчилигига кўра, полиция шахсни бир суткага ушлаб туриши, кейин эса бир марта бу муддатни яна 24 соатга узайтириши мумкин, деди Блоомберг манбаси.

ТФ1 нашри терговчига таяниб ёзишича, прокурорлар уни ҳибсга олишни сўрашади, чунки улар мамлакатдан осонгина қочиб кетишига ишонадилар. Бунинг учун Дуровда барча имкониятлар мавжуд: самолёт, паспорт ва катта миқдорда пул.

Франция расмийлари Дуровнинг ҳибсга олингани ҳақида ҳозирча ҳеч қандай расмий баёнот бермаган. Россия давлат агентлигининг ТАСС хабарига кўра, Париж прокуратураси 26 август, душанба куни содир бўлган воқеалар ҳақида қўшимча маълумот беришга ваъда берган. «Тўлиқ матбуот баёноти эртага эълон қилинади», деди агентликка прокуратура вакили.

Якшанба куни кечқурун Телеграм Дуровнинг ҳибсга олиниши ҳақидаги маълумотлар юзасидан расмий баёнот берди. Унда айтилишича, ижтимоий тармоқ «Европа Иттифоқи қонунларига мос келади» ва унинг модерация тамойиллари саноат стандартларига жавоб беради ва «доимий равишда такомиллашмоқда».

“Телеграм раҳбари Павел Дуровнинг яширадиган ҳеч нарсаси йўқ ва у тез-тез Европа бўйлаб саёҳат қилади. Ушбу платформани суиистеъмол қилиш учун платформа ёки унинг эгаси жавобгар, деб айтиш бемаъниликдир», - деди мессенжер.

«Биз ушбу вазият тезда ҳал қилинишини кутамиз», деб ёзади Телеграм.

Дуровнинг ҳибсга олиниши якшанба куни тушдан кейин кучли реакцияга сабаб бўлди.

Илон Маск ўз навбатида, Дуровни қўллаб-қувватлади ва сўнгги пайтларда у билан ёмон муносабатда бўлган Европа Иттифоқини сўз эркинлигини бузганликда айблаш имкониятини қўлдан бой бермади.

Бунинг сабаби, Маск Твиттерни сотиб олгач, авваллари муносиб муҳокама қилиш қоидаларини бузгани учун тақиқланган персонажларни платформага қайтарди. Аввало, Дональд Трамп, унинг номзодини Маск АҚШда бўлиб ўтадиган президентлик сайловларида қизғин қўллаб-қувватлайди.