Япония Бош вазири ўғлини истеъфога чиқармоқда

Япония Бош вазири Фумио Кисиданинг тўнғич ўғли Сётаро Кисида 1 июнь куни отасига котиблик лавозимидан озод этилади. Шу билан бирга у давлат ғазнасига ишдан бўшатилиши билан боғлиқ ва бошқа тўловларни қайтариши шарт. Бу ҳақда Вазирлар Маҳкамаси бош котиби Хироказу Мацуно маълум қилди.

Бу масаладан Сётаронинг хабари бор. Аввалроқ Бош вазир ўғлига “кескин огоҳлантириш” берган, бироқ бу чора муаммони юмшата олмади. “Yomiuri” газетаси ёзишича, ушбу истеъфо орқали Фумио Кисида маҳкамага етказилган зарарни камайтиришга уринмоқда.

Нашр сўров натижасида аниқланган ҳолатга, яъни ҳукуматнинг қўллаб-қувватлаш салоҳияти пасайиб кетганига ишора қилган. Тўғри, бу кўрсаткич Хиросимада Бош вазир учун анча муваффақиятли ўтган “катта еттилик” саммитидан кейин ошди.

Бош вазир ўғли билан боғлиқ воқеа 2022 йил декабрда “Shukan Bunshun” ҳафталигида чоп этилган мақоладан кейин бошланди. Мухбир ҳукумат раҳбари ўз қароргоҳига ўнга яқин қариндоши ва танишини таклиф қилганини ёзган. Яқинлар бинонинг қизил гилам тўшалган зинасида суратга тушган. Одатда, бу ерда Вазирлар Маҳкамасининг янги таркиби – ҳукумат аъзолари, Император томонидан тасдиқлангандан кейин суратга олинар эди.

Кисиданинг тўнғич ўғли ҳақидаги шов-шувли хабарлар матбуотда чиқиши шу билан тўхтагани йўқ. Январь ойида Сётаро расмий дипломатик автомобилдан саёҳат мақсадида фойдаланиш, шунингдек, хорижда ноқонуний харид қилишда ҳам айбланган.

Кичик Кисида ўтган йил октябрь ойида отасининг сиёсий котиби этиб тайинланган. Япония ҳукумати раҳбарининг турли соҳалар бўйича саккиз нафар расмий котиби бор.