Украинага қарши урушда қатнашиш учун Россия армиясига қўшилган ўзбекистонлик эркак қамалди

Жорий йилнинг 24 июнь куни Қорақалпоғистон Республикаси ЖИБ Амадурё тумани судида судланувчи Х.Х.га (исми ўзгартирилган, эркак) оид жиноят иши кўриб чиқилди.

Судланувчи Х.Х. 2023 йилнинг декабрь ойида Москва шаҳрига ишчи бўлиб ишлаш мақсадида чиқиб кетиб, у ерда меҳнат мигранти сифатида турли қурилиш объектларида ишлаб келиб, жорий йил 5 февраль куни бошида 195 000 рубль, кейинчалик ҳар ой 240 000 рубль миқдорида ойлик маош эвазига Россия тарафини олиб, Украина давлатига қарши ҳарбий ҳаракатларда қатнашиш учун РФ Мудофаа Вазирлиги Москва шаҳар бўлими билан шартнома тузган.

Шундан сўнг, Х.Х. ва дастлабки терговда шахсига аниқлик киритишнинг имкони бўлмаган меҳнат мигрантлари билан биргаликда Москва вилоятида жойлашган РФ Мудофаа Вазирлигига қарашли "Авангард" номли ҳарбий лагерида ҳарбий ўқув-машғулотларда қатнашиб, жанговар тайёргарликдан ўтиш ва ҳарбий кўникмаларни шакллантириш учун олиб келиниб, Х.Х.га "оддий аскар" махсус ҳарбий унвони берилиб, "ўқчи" лавозими тайинланган. У ҳарбий лагерда махсус ҳарбий жанговар тайёргарликдан ўтган.

Х.Х. жорий йил 9 февраль куни ҳарбий лагердан қочиб, РФдан Ўзбекистонга "Москва-Урганч" авиарейси орқали учиб, ўзининг Қорақалпоғистон Республикаси Амударё туманидаги доимий яшаш манзилига қайтиб келган.

Суд ҳукмига кўра, судланувчи Х.Х. ЖКнинг 154-моддаси 1-қисмида назарда тутилган жиноятни содир этганликда айбли деб топилди ва унга шу модда билан ЖКнинг 57-моддасини қўллаган ҳолда 3 йилга озодликдан чеклаш жазоси тайинланди. Жазони ўташ манзили этиб унинг доимий яшаш жойи белгиланди. Судланувчи Х.Х. яшаш жойидан соат 21:00 дан 06:00 га қадар чиқиб кетиши чекланди.