Танзила Норбоева ЕИнинг Марказий Осиё бўйича махсус вакили билан учрашди

Олий Мажлис Сенати раиси Танзила Норбоева Европа иттифоқининг Марказий Осиё бўйича махсус вакили Терхи Хакала ҳамда ЕИнинг терроризмга қарши кураш бўйича мувофиқлаштирувчиси Илкка Салми билан учрашди, деб хабар бермоқда «Дунё» АА мухбири.

Парламент юқори палатаси маълумотига кўра, мулоқот давомида мамлакатимизнинг ЕИ билан муносабатларининг турли йўналишлари, хусусан парламентлараро алоқаларни ривожлантириш, инсон ҳуқуқ ва эркинликларини таъминлаш, терроризм ва экстремизмга қарши кураш соҳасидаги ҳамкорлик масалалари муҳокама қилинди.

Сенат раиси Ўзбекистон ва ЕИ ўртасида кейинги йилларда турли даражадаги мулоқот фаоллашганини таъкидлаб, ЕИ делегациялари, хусусан, Европа Кенгаши, ЕИ комиссияси ва Европа парламенти вакилларининг Ўзбекистонга амалий ташрифлари, мамлакатимиз ҳукумати ва парламенти вакилларининг эса Европа иттифоқига ташрифлари амалга оширилаётганини алоҳида қайд этди.

– Биз Ўзбекистон ва Европа парламенти ўртасидаги парламентлараро алоқаларни ривожлантиришда кузатилаётган ижобий динамикани давом эттириш тарафдоримиз. Бу борада «Ўзбекистон – ЕИ» Парламент ҳамкорлиги қўмитаси доирасида ташкил этилган мулоқот муҳим ўрин тутади, – дея таъкидлади Танзила Норбоева.

Ўз навбатида Терхи Хакала самимий қабул учун миннатдорлик билдириб, Ўзбекистон «ЕИ – Марказий Осиё» форматида фаол иштирок этаётгани, савдо-иқтисодий ва сармоявий алоқаларни кенгайтириш, ЕИнинг етакчи компанияларини Ўзбекистонга жалб этишга катта аҳамият берилишини билдирди.

– ЕИ Ўзбекистонда кечаётган туб демократик янгиланишларни тўла қўллаб қувватлайди ва бу борада Ўзбекистоннинг барча соҳаларда халқаро умумэътироф этилган принципларга содиқлигини олқишлайди. «ЕИ – Ўзбекистон» мулоқотини амалий мазмун билан янада бойитиш тарафдоримиз, – дея таъкидлади Терхи Хакала.

Учрашув якунида муҳокама этилган масалалар бўйича ҳамкорликни янада кучайтиришга келишиб олинди.