Шакар қариш жараёнини тезлаштирадими?
Сиз кунига қанча шакар истеъмол қиласиз? Унинг ўлчамига эътибор бериш яхшидир. Чунки мутахассислар шакарни кўп истеъмол қилиш саломатлик учун зарарли эканлигини таъкидламоқда.
Ўртача бир киши кунига 225 г шакар истеъмол қилади. Бу тана учун жуда кўп. "Бизнинг шифокор" лойиҳасига интервью берган эндокринолог шифокорларнинг фикрига кўра, барча озиқ-овқат маҳсулотларидаги шакарни қўшиб ҳисоблаганда, унинг миқдори кунига 20-25 граммдан ошмаслиги керак.
Агар сиз шакарни кўп истеъмол қилсангиз, танада ортиқча ёғлар тўпланади, қариш жараёни кучаяди, юрак-қон томир касалликлари пайдо бўлади. Танадан кальций ювилади, В гуруҳи витаминлари сўрилиши секинлашади ва иммунитет тизимининг иши 17 марта камаяди. Шакарни кўп истеъмол қилиш, шунингдек, қалқонсимон без функциясини пасайтиради, натижада метаболизм бузилади. Ортиқча вазнли ва қандли диабетга чалинганлар сонининг йил сайин ортиб бориши ҳам ана шу кўп шакар истеъмолининг натижасидир. Мутахассислар ортиқча вазнга эга бўлсангиз, тез-тез пешоб чиқариш, қаттиқ чанқоқ, доимий очлик аломатларни кузатсангиз, шифокор кўригидан ўтиш зарурлиги ҳақида огоҳлантиради. Сўнгги йилларда 2-тоифа қандли диабет болалар орасида кўпроқ учрамоқда.
Шакар, албатта, бизга вақтинчалик куч беради, натижада қарамлик пайдо бўлади. Ҳатто биз ҳар куни истеъмол қиладиган овқатларда ҳам яширин шакар мавжуд. Буни билиш учун озиқ-овқат қутисига ёзилган таркибига эътибор қаратиш лозим. Мутахассисларнинг огоҳлантиришича, газланган алкоголсиз ичимликлар, оқ ундан тайёрланган ширинликлар ва фаст-фуд, ҳатто кетчуп ва майонезда ҳам шакар бор, лекин табиий шакар асосан мева ва қуритилган меваларда учрайди.
Кундалик керакли миқдордаги ширинликни фақат табиий маҳсулотлардан олсак, саломатликка салбий таъсир кўрсатмайди.
