Сербия Путин ташрифини кутмоқда
Сербия ҳукумати 2021 йил охирига қадар Россия президенти Владимир Путинни Белградга ташриф буюришини кутмоқда. Бу ҳақда Сербия ташқи ишлар вазири Никола Селакович хабар берди.
У Россия ташқи ишлар вазирининг ўринбосари Aлександр Грушко билан икки томонлама музокаралар натижаси бўйича ўтказилган матбуот анжуманида мазкур учрашув мамлакати учун шараф эканини таъкидлаган.
Селакович Россияга пандемия пайтида кўрсатган ёрдами ва Сербияда Sputnik V вакцинасини ишлаб чиқаришни йўлга қўйгани учун миннатдорчилик билдирди.
Шунингдек, вазирликларнинг таълим соҳасидаги ишлари, минтақавий ва халқаро даражадаги ҳамкорлик масалалари муҳокама қилинган.
Анжуманда, Aлександр Грушко пандемия орқага чекиниши билан ҳамкорликни босқичма-босқич тиклашга умид билдирди. У Россия президентининг Белградга ташрифи эҳтимолини ҳам тасдиқлаб ўтган.
Қолаверса, Грушко музокаралар чоғида Россия ва Сербия ҳамкорлигининг иқтисодий бўлимидаги ишлар ҳолатига алоҳида эътибор берилганини эътироф этган.
Россия Президентининг Сербияга ташрифи ўтган йилдан бери муҳокама қилинмоқда. Aввалроқ Владимир Путин ушбу мамлакатга 2020 йил октябрда бориши ва Aвлиё Сава черковининг очилиш маросимида иштирок этиши режалаштирилган эди. Бинобарин, пандемия туфайли ташриф бекор қилинган.
