"Париж-2024": Отабек Умаров Ўзбекистон спорт делегацияси аъзолари билан суҳбатлашди
XXXIII ёзги Олимпия ўйинларида иштирок этаётган спортчиларимизнинг беллашувларда муносиб натижаларга эришишида уларни руҳий қўллаб-қувватлаш муҳим омил саналади.
Францияда давом этаётган ёзги Олимпия ўйинларининг турли тадбирларида иштирок этаётган Осиё Олимпия кенгаши (OOK) вице-президенти Отабек Умаров Париж шаҳрида жойлашган «Олимпия шаҳарчаси»да бўлиб, Ўзбекистон делегацияси учун яратилган шарт-шароитлар билан танишди.
Ташриф давомида атлетларимиз учун ажратилган хоналар, машғулот заллари, Ўзбекистон спорт делегацияси штаб фаолияти, тиббиёт бўлими иш тартиби кўздан кечирилди.
Спортчилар, мураббий ва мутахассислар билан суҳбатлашилди. Машғулотлар жараёни, мусобақаларда иштирок этиш учун белгиланган режа-дастурлар, техник воситаларнинг ҳолати каби масалаларда фикрлашилди, дея хабар бермоқда Спорт вазирлиги матбуот хизмати.
