Ливан «иккинчи Ғазо»га айланади(ми)?
Антониу Гутерриш халқаро ҳамжамиятни Ливаннинг «иккинчи Ғазо»га айланишининг олдини олишга чақирди.
БМТ Бош Ассамблеясининг Нью-Йоркда давом этаётган сессиясида Ливандаги вазият муҳокама қилинди. Ташкилот Бош котиби Антониу Гутерриш халқаро ҳамжамиятни «эскалациядан хавотирда бўлишга» ва Ливаннинг «иккинчи Ғазо»га айланишига йўл қўймасликка чақирди.
АҚШ президенти Жо Байден Исроилнинг бомбардимон қилишлари бошланганда ҳам дипломатик ечим «ҳали ҳам мумкин» ва «тўлиқ миқёсли урушлар ҳеч кимнинг манфаатларига мос келмаслигига» ишонч билдирди.
Туркия раҳбари Ражаб Тоййиб Эрдўған, ўз навбатида, Исроилнинг Ғазо ва Ливандаги ҳаракатларини кескин танқид қилиб, «70 йил аввал инсоният Гитлерни тўхтатганидек Нетаняху ва унинг қотиллар тўдасини тўхтатишга» чақирди.
«Биз ҳозирги шароитда Исроилни жиловлаш учун куч ишлатиш масаласини кўриб чиқиш зарур деб ҳисоблаймиз», деди Туркия президенти.
24 сентябрь куни Исроил армияси Ливанга иккинчи кун кетма-кет йирик ҳаво ҳужумларини давом эттирди, уларнинг нишонлари ИДнинг таъкидлашича, Ҳизбуллоҳ билан боғлиқ нишонлардир. Ливан пойтахти Байрут ҳам ҳаво ҳужумларига учраган.
Исроил мудофаа кучларининг Байрутга нишонга берилган зарбаси натижасида «Ҳизбуллоҳ»нинг жанговар қаноти етакчиларидан бири, гуруҳ ракета кучлари қўмондони Иброҳим Ал-Кубаисий ҳалок бўлган. ИД вакилининг айтишича, ўша пайтда у билан ҳаракатнинг «бошқа асосий қўмондонлари» бўлган. Исроил ҳарбийларига кўра, ал-Қубаиси «кўп йиллар давомида Исроил фуқароларига ракета учирилиши» ва «кўп сонли терактларни режалаштириш» учун жавобгар бўлган.
ИД шунингдек, икки кун давом этган бомбардимонда Ҳизбуллоҳга алоқадор 1500 та нишонга 200 та турли жойда, жумладан 400 та ракета отиш мосламаси ва 70 та қурол омбори ҳужумга учраганини айтди. Исроил армияси Ҳизбуллоҳ инфратузилмасини бутунлай йўқ қилиш ва «Исроил шимолида хавфсизликни таъминлаш» учун зарба беришни давом эттиришга ваъда берди.
Ливан Соғлиқни сақлаш вазирлиги, ўз навбатида, Байрутга қилинган зарбада олти киши ҳалок бўлганини ва 15 киши жароҳат олганини маълум қилди, уларнинг қанчаси Ҳизбуллоҳ билан алоқадорлигини аниқламади. Гуруҳнинг ўзи ҳужум ҳақида изоҳ бермади.
Исроил 23 сентябрь куни Ливанни кенг кўламли бомбардимон қила бошлади. Биринчи куни Ливан Соғлиқни сақлаш вазирлиги маълумотларига кўра, 558 киши, жумладан 50 бола ва 94 аёл ҳалок бўлган, яна 1835 киши жароҳатланган. Мамлакат жанубидаги минглаб аҳоли уйларини тарк этишга мажбур бўлди.
