Кечаси ухламайдиганларнинг мияси яхши ишлайди
Янги тадқиқот шуни кўрсатадики, тунги “бойқушлар”нинг зеҳни эрта турадиган одамларга қараганда ўткирроқ бўлиши мумкин экан.
Тунда фаол ва тетик бўлганлар когнитив тестларда яхшироқ натижаларга эришган.
Лондондаги Imperial College академиклари бошчилигидаги тадқиқотчиларнинг таъкидлашича, турли тадқиқотлар уйқу ва когнитив қобилиятларни, хусусан, ухлаш давомийлигини ўрганган, аммо ухлаш тартиби ёки хронотиплари ва идрок ҳақида жуда кам нарса маълум.
Улар Буюк Британиянинг Biobank тадқиқотида қатнашган минглаб одамлар ҳақидаги маълумотларни ўрганиб чиқиб, уйқунинг давомийлиги, сифати ва хронотипи ўртасидаги "мураккаб муносабатларни" ўрганишди — улар тадқиқотда "эрталаблик", "кечқурунлик" ёки "ўрталик" деб таснифланган.
Тадқиқотда иштирок этган одамларнинг ақл-заковати, фикрлаш қобилиятлари, реакция вақтлари ва хотирасини текширадиган тестлар ўтказилди.
Тадқиқотчилар 27 мингга яқин одам ҳақидаги маълумотларни таҳлил қилиб, уларнинг ушбу тестларни қанчалик яхши бажарганликларини ўзлари билдирган уйқу давомийлиги, уйқу режими ва уйқу сифати билан солиштиришди.
BMJ Public Health журналида эълон қилинган тадқиқотга кўра, ҳар кеча 7 соатдан 9 соатгача ухлайдиган одамлар тестларда энг яхши натижаларга эришган.
Академиклар, шунингдек, тунги “бойқушлар” ва "ўрталик" деб таснифланганларнинг "юқори когнитив функцияга" эга эканлигини аниқладилар.
