Жавоб айтилди: Шимолий Корея АҚШ билан музокара олиб бормоқчи эмас!
АҚШ КХДР билан алоқа ўрнатиш учун бир неча бор турли хил каналлар орқали ҳаракат қилди, аммо бу уринишларнинг ҳаммаси Пхенян томонидан рад этилган.
Бу ҳақда КХДР ташқи ишлар вазирининг биринчи ўринбосари Цой Сон Хи айтиб ўтди.
“Феврал ойининг ўрталаридан бошлаб турли каналлар, жумладан, Нью-Йорк орқали АҚШ биз билан алоқа ўрнатишга уринди. Аммо биз АҚШнинг бу ҳийла-найрангларига жавоб қайтаришнинг ҳожати йўқ деб ўйлаймиз", – дейилади ЦТАК ахборот агентлигининг пайшанба куни эълон қилинган баёнотида.
Цой Сон Хи "агар Қўшма Штатлар КХДРга қарши душманлик сиёсатидан воз кечмаса, ҳеч қандай корейс-америка музокаралари ўтказилмаслигини" таъкидлаган. Вазир ўринбосари, шунингдек, диалогни ўрнатиш учун томонлар бир хил музокара столига тенг шароитда ўтириши мумкин бўлган муҳитни яратиш кераклигини айтган.
13 март куни АҚШ маъмуриятининг юқори мартабали амалдорининг айтишича, Вашингтон деярли бир ойдан бери "турли каналлар орқали" Пхенян билан боғланишга ҳаракат қилмоқда, аммо ҳали ҳам жавоб олмаган.
АҚШнинг янги ҳукумати Корея ярим оролини ядросизлантириш учун КХДР билан тўғридан-тўғри икки томонлама мулоқотга таянишни режалаштирмаслигини ҳам олдинроқ ишора қилди. Оқ уй январ ойида Президент Жо Байден бошчилигидаги АҚШнинг ҳозирги маъмурияти КХДРга нисбатан янги стратегия тайёрламоқчи ва бошқа нарсалар қатори Пхенянни ушлаб туриш йўлини тутаётганини эълон қилган эди.
