Жанубий Африкадаги браконьерлар каркидонларни ўлдиргани учун 50 йилгача қамоқ жазосига ҳукм қилинади

Жанубий Африкадаги суд оқ каркидонларни ўлдирган уч браконьерни кўп йиллик қамоқ жазосига ҳукм қилди. Доминик Мниси, Лвази Маламбе ва Аянда Нгомане мос равишда 50 йил, 33 йил ва 21 йил қамоқ жазосига ҳукм қилинди. Улар каркидонларни тўғридан-тўғри ов қилишдан ташқари, ноқонуний қурол сақлаш, жиноий тил бириктириш ва бошқа ўнга яқин жиноятларда айбланган.

Мниси ва Маламбе 2017 йил январида Крюгер миллий боғида қўлга олинган эди. Уларда милтиқ, патронлар ва тўртта янги кесилган каркидон шохи бор эди. Улар қўлга олинган жойдан унча узоқ бўлмаган жойда отиб ўлдирилган иккита оқ каркидон топилган. Иккала айбланувчи ҳам судгача гаров эвазига озод қилинди.

2019 йилда боғ қўриқчилари шохлари кесилган яна бир ўлик каркидонни топдилар. Браконьерларни ҳидловчи ит топди. Улар Мниси ва унинг янги шериги Нгомане бўлиб чиқди. Жиноятчиларда милтиқ, гильзалар, пичоқ ва иккита шох мусодара қилинган.

"Мен пушаймонман ва жиноят қилиш тўғри эмаслигини тушундим", деди Мниси сўнгги суд мажлисида. Унга шериклари ҳам жавоб беришди. Суд уларнинг сўзлари чин дилдан тавба қилишдан кўра, қўлга тушганидан афсусланишга ўхшаб кетганини аниқлади ва жазо жиноятларга мутаносиб эканини таъкидлади.