“Ҳизбуллоҳ” янги бош котиб тайинлангани ҳақидаги маълумотни рад этди

Ливаннинг “Ҳизбуллоҳ” ҳаракати Ҳасан Насруллоҳ ўлимидан сўнг ҳаракат ижроия кенгаши раиси Ҳошим Сафийиддиннинг бош котиб лавозимига тайинланганини рад этди, деб ёзади Anadolu.

“Ҳизбуллоҳ” ёзма баёнотида баъзи матбуотда янги бош котиб тайинланиши ҳақидаги хабарларнинг аҳамияти йўқлигига урғу берди.

«Аниқлик киритмоқчимизки, баъзи оммавий ахборот воситаларида Бош котиб (Насруллоҳ) шаҳид бўлганидан кейин Ҳизбуллоҳ раҳбарлигидаги ташкилий тартиб-қоидалар ҳақида тарқалган хабар нотўғри», - дейилади баёнотда.

Ҳизбуллоҳ ҳаракат раҳбариятининг расмий баёноти чиқмагунча, бундай хабарларга ишонмасликка чақирди.

Эслатиб ўтамиз, аввалроқ Ливандаги “Ҳизбуллоҳ” гуруҳининг Шўро кенгаши (асосий бошқарув органи) Ҳошим Сафи ад-Динни ташкилотнинг янги бош котиби этиб сайлагани хабар тарқалганди. Ҳошим Сафи ад-Дин 1964 йилда Ливан жанубидаги Дайр ан-Наҳр шаҳрида туғилган. У Нажаф ва Қумда Насруллоҳ билан бирга машғулотлар олиб борган ва 1982 йилда Ҳизбуллоҳга асос солган. 1994 йилда Сафи ад-Дин шу пайтгача бутун гуруҳни бошқарган Насруллонинг ўрнига ижроия қўмита раҳбари бўлди.

23 сентябрдан бери Исроил ҳаво кучлари Ливан жанубида, шунингдек, Бекаа ва Баалбек ҳудудларида юзлаб ҳаво ҳужумларини амалга оширди.

Ливан расмийларига кўра, 17 сентябрдан бери Исроил ҳужумларида 1174 киши, жумладан 104 бола ва 194 аёл ҳалок бўлган.