Дунё зудлик билан Исроилнинг қирғинларига чек қўйиши керак – Эрдўған

Халқаро ҳамжамият Исроилни Ғазо секторидаги қирғинларини тўхтатишга мажбурлаш учун зудлик билан чора кўриши керак. Бу ҳақда Туркия президенти Ражаб Тоййиб Эрдўғон мусулмон оламида нишонланадиган Қурбон ҳайити муносабати билан йўллаган видеомурожаатида айтиб ўтди.

"Дунё зудлик билан Исроилнинг қонхўрлигига қарши чора кўриши ва ҳар куни гувоҳи бўлаётган қирғинларига чек қўйиши керак. Биз ҳар фурсатда [Исроил Бош вазири Бенямин] Нетаньяхуни тўхтатиш кераклигини айтамиз. Буни Италиядаги суҳбатдошларимизга аниқ айтдик. Катта еттилик саммитида биз Ғазодаги геноцид айбдорларини [Халқаро Адлия судида] жавобгарликка тортиш учун кучларимизни сафарбар қилдик”, деди Эрдўған.

Унинг сўзларига кўра, Туркия БМТга аъзо бўлган давлатларнинг имкон қадар кўпроқ мустақил Фаластин давлатини тан олиши учун ҳаракат қилмоқда. «Биз, шунингдек, Ғазодаги ечим масаласида ислом дунёсининг бирдек ҳаракат қилишини таъминлаш учун ҳаракат қиламиз», деди Эрдоған.