Асакада электр таъминоти бўйича шартномасини сохталаштирган ва 515,2 млн сўмлик электр энергиясидан ноқонуний фойдаланганлар ушланди

Бош прокуратура ҳузуридаги Департаментнинг Асака туман бўлими томонидан туман ЭТК ходимлари билан ҳамкорликда ўтказилган тезкор тадбирда “М.” МЧЖ масъул шахслари ва бошқалар “Янгисор” МФЙ ҳудудидаги боғдорчилик ер майдонига ўрнатилган 2 та сув насосини ҳамда дала шийпонидаги техникаларни ҳеч қандай ҳужжатсиз тижорат мақсадида умумий фойдаланишдаги электр тармоғига ўғрилик йўли билан улаб, жами 515,2 млн сўмлик электр энергиясидан ноқонуний фойдаланганликлари, шунингдек электр таъминоти бўйича шартномасини сохталаштирганликлари аниқланган.

Шу каби, Департаментнинг Каттақўрғон шаҳар бўлими томонидан ўтказилган терговга қадар текширувда фуқаро Ш.Х. Каттақўрғон тумани “Навбаҳор” МФЙ ҳудудидаги автомобилларни ювиш шохобчасини ҳеч қандай ҳужжатсиз тижорат мақсадида умумий фойдаланишдаги ичимлик суви тармоғига улаб, жами 125,9 млн сўмлик ичимлик сувидан ноқонуний фойдаланганлиги аниқланган.

Департаментнинг Норин туман бўлими томонидан “Ўзэнергоинспекция” ходимлари билан ҳамкорликда ўтказилган терговга қадар текширувда эса, фуқаро Ш.А. “Яйдоқ” МФЙ ҳудудидаги умумий овқатланиш биносини ҳеч қандай ҳужжатсиз тижорат мақсадида электр тармоғига ўзбошимчалик билан улаб, жами 108,8 млн сўмлик электр энергиясидан ноқонуний фойдаланганлиги аниқланган.

Мазкур ҳолатлар юзасидан Жиноят кодексининг 169-моддаси (ўғрилик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш ) билан жиноят ишлари қўзғатилиб, тергов ҳаракатлари ўтказилмоқда.