Zelenskiy Vashingtonni keskin tanqid qildi

AQSh prezidenti Donald Tramp Rossiya prezidenti Vladimir Putin bilan Rossiya dizel yoqilg‘isini Amerika va jahon bozorlariga yetkazib berish bo‘yicha kelishuvga erishganini ma’lum qildi. Kelishuv davlat rahbarlarining telefon orqali muloqoti chog‘ida muhokama qilingan.

Trampning so‘zlariga ko‘ra, 300 ming tonnadan ortiq dizel yoqilg‘isi zudlik bilan yetkazib berilishi kerak. Noyabr oyida yana 500 ming tonna, keyinchalik esa qo‘shimcha bir million tonna yoqilg‘i yetkazib berish rejalashtirilgan. Rossiya o‘zining neftni qayta ishlash zavodlari holatidan kelib chiqib, qisqa muddatda yana uch million tonnagacha dizel yetkazib berishga ham tayyor. Biroq ushbu qo‘shimcha yetkazib berishlar muddati hozircha aniqlanmagan.

Rossiya yoqilg‘isini amaldagi sanksiyalarga qaramay import qilishga ruxsat berish uchun AQSh Moliya vazirligi vaqtinchalik lisenziya bergan. Unga ko‘ra, Rossiya dizelini sotish, yetkazib berish, tushirish va import qilishga 2027 yil 7 aprelgacha ruxsat etilgan.

Bu qaror Vashingtonning Rossiyaga nisbatan avvalgi siyosati bilan farq qiladi. Sentyabr oyida Tramp Ukrainadagi urush sababli Rossiyaga qarshi yangi sanksiyalar joriy etish vakolatlarini kengaytiruvchi qonunni imzolagandi.

Ukraina prezidenti Vladimir Zelenskiy esa Moskva bilan erishilgan kelishuvni tanqid qildi. Uning fikricha, sanksiyalarni yumshatish «yaqqol zaiflik» belgisi bo‘lib, Rossiyaga neft mahsulotlarini sotishga ruxsat berish «Ukrainaga qarshi urushga sarmoya kiritish» bilan barobar.

Kelishuvga AQShda yoqilg‘i narxining oshishi ham ta’sir ko‘rsatgan bo‘lishi mumkin. Kongressga oraliq saylovlarga bir oydan kam vaqt qolgan bir paytda benzin va dizel narxining ko‘tarilishi Respublikachilar partiyasi uchun siyosiy muammoga aylangan.

Reuters ma’lumotlariga ko‘ra, AQShda dizel yoqilg‘isining o‘rtacha narxi bir gallon uchun 6,28 dollarga yetgan.