O‘zbekistonda isitish va issiq suv tariflari oshirilishi mumkin

O‘zbekistonda aholi uchun isitish va issiq suv ta’minoti tariflarini 2026 yil 1 noyabrdan oshirish rejalashtirilmoqda. Bu Qurilish va uy-joy kommunal xo‘jaligi vazirligi muhokamaga qo‘ygan hukumat qarori loyihasida nazarda tutilgan.

Hujjatda mamlakat bo‘ylab issiqlik ta’minoti korxonalari uchun yangi tariflarni tasdiqlash taklif qilingan. Qaror qabul qilinganidan keyin uch kun ichida yuridik shaxslar uchun tariflarni Vazirlar Mahkamasi huzuridagi Idoralararo tarif komissiyasi tasdiqlashi kerak.

Loyihaga ilova qilingan tushuntirishda aytilishicha, Prezidentning 2025 yil 11 martdagi qarorida aholi uchun issiqlik ta’minotining pasaytirilgan tariflarini 2030 yilgacha bosqichma-bosqich xizmatlarning tannarxi darajasiga yetkazish belgilangan.

Shuningdek, 2026 yil 1 iyundan kuchga kirgan yoqilg‘i-energetika resurslari narxining oshirilishi ham inobatga olingan.

Loyihaga ko‘ra, 1 noyabrdan Veolia Energy Tashkent iste’molchilari uchun QQS bilan quyidagi tariflar taklif etilmoqda:

• Issiqlik energiyasi — 1 Gkal uchun 203 636 so‘m (30 foizga oshadi; hozir — 156 643 so‘m).
• Isitish — isitiladigan maydonning 1 kv. metri uchun sutkasiga 314 so‘m (30 foizga oshadi; hozir — 241,44 so‘m).
• Hisoblagich bo‘yicha issiq suv — 1 kub metr uchun 11 607 so‘m (30 foizga oshadi; hozir — 8 928,67 so‘m).
• Hisoblagichsiz issiq suv — bir kishi uchun oyiga 45 330 so‘m (amaldagi tarifga nisbatan 30 foizga oshadi; 1,5 oshiruvchi koeffisiyent hisobga olinmagan).

Umumiy dushxonali yotoqxonalarda yashovchilar uchun issiq suv tarifi bir kishi uchun oyiga 33 720 so‘m etib belgilanishi taklif qilinmoqda. Bu oshiruvchi koeffisiyentsiz tarifga nisbatan 30 foizga ko‘p.

Toshkentda tariflar so‘nggi marta 2025 yil 12 noyabrda oshirilgan.

Loyihada Qoraqalpog‘iston va O‘zbekistonning barcha viloyatlaridagi issiqlik ta’minoti korxonalari tariflarini qayta ko‘rib chiqish ham nazarda tutilgan.

Jumladan, Navoiy viloyatida isitish tarifini Navoiy shahrida bir kvadrat metr uchun sutkasiga 141 so‘m, Zarafshonda 418 so‘m, Uchquduqda 455 so‘m va Konimex tumanida 250 so‘m etib belgilash taklif qilinmoqda.

Samarqand viloyatida tarif Samarqand shahri uchun 279 so‘m, Nurabod uchun esa 585 so‘m bo‘ladi.

Toshkent viloyatida quyidagi o‘zgarishlar taklif etilmoqda:

Shunday qilib, Toshkent viloyatidagi sanab o‘tilgan korxonalar uchun tariflarni taxminan 30 foizga oshirish taklif qilinmoqda.