Tayvan AQShdan 2026 yil oxirigacha 500 ta Stinger raketasini oladi

Tayvan 2026 yil oxirigacha AQShdan 500 ta Stinger zenit raketasi va 178 ta uchirish qurilmasini olishni rejalashtirmoqda. Bu Amerikada ishlab chiqarilgan ko‘chma zenit-raketa komplekslarini xarid qilish bo‘yicha ikki bosqichli dastur doirasidagi birinchi yetkazib berish partiyasi bo‘ladi. Bu haqda Taipei Times nashri Tayvan Mudofaa vazirligi vakiliga tayanib xabar berdi.

Dastur doirasida jami 2 621 ta Stinger raketasi va 763 ta uchirish qurilmasini xarid qilish ko‘zda tutilgan. Yetkazib berishlar Tayvan qurolli kuchlarining past balandlikdagi havo hujumlariga qarshi mudofaa salohiyatini kuchaytirishga qaratilgan.

Tayvan Mudofaa vazirligi rejasiga ko‘ra, quruqlikdagi qo‘shinlarga 2 235 ta raketa va 657 ta uchirish qurilmasi beriladi. Ushbu qurollar Tayvanning asosiy oroli va unga tutash orol hududlarini himoya qilish uchun mo‘ljallangan.

Harbiy-dengiz kuchlari 295 ta raketa va 85 ta uchirish qurilmasini oladi. Ular dengiz piyodalari hamda ayrim harbiy kemalar ixtiyoriga topshiriladi.

Harbiy polisiyaga esa Taybey va unga tutash hududlarni himoya qilish uchun qo‘shimcha 91 ta raketa va 21 ta uchirish qurilmasi ajratiladi.

AQSh qurollarining Tayvanga yetkazib berilishi Pekinning orolga nisbatan davom etayotgan harbiy bosimi fonida amalga oshirilmoqda. Xitoy Tayvanni o‘z hududining bir qismi deb hisoblaydi va Taybey hamda Vashington o‘rtasidagi harbiy hamkorlikka qarshi chiqadi.