WBO Oriental chempioni Olimjon Nazarov yana bir kamar uchun jang qiladi
O‘ta yengil vazn toifasidagi professional bokschimiz, WBO Oriental kamari sohibi Olimjon Nazarov (30-5-0)ning navbatdagi jangi tafsilotlari ma’lum bo‘ldi.
Hamyurtimiz 5 may kuni Koreya Respublikasining Gohyong shahridagi "Paryeong Gymnasium" majmuasida "Cocky Buffalo" promouterlik kompaniyasi tomonidan tashkil etiladigan professional boks oqshomida ringga ko‘tariladi. Nazarovga o‘sha kuni tailandlik Saravut Jiamtong (11-4-0) raqiblik qiladi.
Ahamiyatlisi, 12 raundga mo‘ljallangan jang o‘ta yengil vazn toifasida vakant bo‘lib turgan WBO International kamari uchun o‘tkaziladi. Bu jangdagi g‘alaba orqali Olimjon o‘z kamarlari sonini 2 taga yetkazib olishi mumkin.
Eslatib o‘tamiz, 38 yoshli Olimjon Nazarov so‘nggi jangini 13 yanvar kuni Vulan Tuolehaziga qarshi o‘tkazib, ochkolar hisobiga ko‘ra g‘alaba qozongan edi.
