O‘zTMK ilmiy-innovasion tadqiqotlar sohasida yangi sahifa ochmoqda

O‘zbekistonning tog‘-kon va metallurgiya sanoatida yuqori malakali mutaxassislar tayyorlash, ta’lim tizimini xalqaro standartlarga moslashtirish va ilmiy tadqiqotlarni rivojlantirishda yangi davr boshlanmoqda. Xususan, 2024-yilda Prezident Shavkat Mirziyoyev tashabbusi bilan tashkil etilgan O‘zbekiston texnologik metallar kombinati dunyodagi eng nufuzli universitetlardan biri AQShning Kolorado konlar maktabi bilan uzoq muddatli hamkorlikni yo‘lga qo‘ymoqda. Ikki tashkilot vakillari o‘rtasida o‘tkazilgan hamkorlik uchrashuvida sohada innovasion loyihalar va ta’lim dasturlarini takomillashtirishga qaratilgan tashabbuslar muhokama qilindi.

Ikki tomonlama ta’lim tizimining afzalliklari

Kolorado konlar maktabi bilan hamkorlikni amalga oshirish orqali qo‘shma o‘quv rejalar ishlab chiqilib, mutaxassislarni tayyorlash uchun moslashtirilgan dasturlarni joriy etish rejalashtirilmoqda. Shu bilan birga, talabalar va professor-o‘qituvchilar uchun xalqaro tajriba orttirish imkoniyatlari yaratilib, yiliga 10 dan ortiq talaba va mutaxassislar Kolorado konlar maktabida amaliyot o‘tab, ilg‘or tajribalarni o‘rganish imkoniga ega bo‘lishadi. Ikki tashkilot o‘rtasidagi hamkorlik sababli, yosh mutaxassislarning startap loyihalarini qo‘llab-quvvatlash, texnologik innovasiyalarga yo‘naltirilgan laboratoriyalarni tashkil etish va ularni zamonaviy uskunalar bilan jihozlash, mamlakatimizning iqtidorli talabalari uchun Kolorado konlar maktabida o‘qishga mo‘ljallangan maxsus stipendiya dasturlarini yo‘lga qo‘yish, qo‘shma ilmiy-tadqiqot loyihalari uchun xalqaro grantlar ajratish muhim vazifalar sifatida qaralmoqda.

Texnologik metallar oliy maktabi tashkil etiladi

O‘zbekiston texnologik metallar kombinati Kolorado konlar maktabi bilan hamkorlikda Texnologik metallar oliy maktabini ham tashkil etishni rejalashtirgan bo‘lib, unda ta’lim va tadqiqot jarayonlari xalqaro standartlar asosida, zamonaviy talablarga mos ravishda yo‘lga qo‘yiladi. Bu ta’lim muassasasi innovasion yondashuvlar va ilg‘or texnologiyalar orqali yuqori malakali mutaxassislar tayyorlashni maqsad qilgan. Yillik bitiruvchilar soni 50-70 nafarni tashkil etib, ular nafaqat milliy, balki xalqaro bozorda ham talabgir bo‘lgan, yuqori saviyadagi kadrlar sifatida faoliyat ko‘rsatadi. Bundan tashqari, Texnologik metallar oliy maktabi doirasida soha mutaxassislari uchun qayta tayyorlash va malaka oshirish kurslari tashkil etiladi. Ushbu kurslar orqali esa kadrlar sohaning eng yangi tendensiyalari va ishlab chiqarish texnologiyalari bilan tanishib, o‘z professional darajalarini oshirish imkoniyatiga ega bo‘ladilar. Xalqaro standartlarga mos ta’lim dasturlari mutaxassislarga nafaqat nazariy bilimlarni, balki amaliyotda qo‘llash uchun zarur bo‘lgan ko‘nikmalarni ham taqdim etadi. Bu esa ularning kasbiy malakasini yuqori bosqichga ko‘tarib, dunyo miqyosida raqobatbardosh kadrlar sifatida yetishib chiqishlariga yordam beradi. Shu tariqa, ushbu maktab metallurgiya sohasidagi barqaror rivojlanish va professional kadrlarni tayyorlashda muhim o‘rin tutadi.

Kolorado Konlar Maktabi vakili Kadri Degdilen:

• Tabiiy resurslarga, ayniqsa, zamonaviy hayot darajasini ta’minlash va innovasion texnologiyalarni rivojlantirish uchun zarur bo‘lgan texnologik metallarga bo‘lgan talab yildanyilga ortib bormoqda. O‘zbekistonning tabiiy resurs salohiyati, jumladan, texnologik metallarning boy zaxiralari jahon iqtisodiyotida muhim o‘rin tutib, mamlakatni bu sohada yetakchi ishtirokchilardan biriga aylantirishi mumkin. Bu jarayonda “O‘zbekiston texnologik metallar kombinati” ning roli alohida e’tiborga loyiq bo‘lib, u zamonaviy texnologiyalarni joriy etish, ekologik barqarorlikni ta’minlash va yuqori texnologiyali mahsulotlar ishlab chiqarishga qaratilgan strategik maqsadlarni oldiga qo‘ygan shijoatli kompaniya. Albatta, kombinat yetakchi xalqaro institutlar va kompaniyalar bilan faol hamkorlik qilishga intilmoqda, bu esa texnologik rivojlanish va bilim almashinuvi uchun mustahkam zamin yaratadi. Men ushbu tashabbuslarni chin dildan qo‘llab-quvvatlash va ularning yuksak intilishlariga hissa qo‘shish maqsadida bu yerga keldim. Kombinatning sa’y-harakatlari va innovasion yondashuvlari, shubhasiz, e’tirofga loyiq bo‘lib, kelgusida bu hamkorlikning ijobiy natijalari butun dunyo miqyosida o‘z aksini topadi. Bu nafaqat O‘zbekiston iqtisodiyoti, balki xalqaro hamjamiyat uchun ham yangi imkoniyatlar eshigini ochadi.

O‘zTMK tashabbusi bilan Kolorado konlar maktabi vakili mamlakatimizning bir qator yetakchi universitetlari, xususan, Toshkentdagi Markaziy Osiyo universiteti hamda Toshkent davlat texnika universitetida ham bo‘lib, professor-o‘qituvchilar uchun ilmiy uchrashuvlarda ishtirok etdi. Ushbu tadbirlar davomida universitetlarning ilmiy xodimlari xalqaro tajriba va innovasion yondashuvlar bilan tanishish, sohaga doir ilg‘or metodikalarni o‘rganish imkoniyatiga ega bo‘lishdi. Aytish joizki, O‘zbekiston texnologik metallar kombinati va Kolorado konlar maktabi o‘rtasidagi hamkorlik mamlakatimizning ilmiy-innovasion tadqiqotlar sohasidagi yetakchi mavqeini yanada mustahkamlashga xizmat qiladi.