Ushbu ish haftasida kuchli issiq kutilmaydi
Ish haftasi davomida O‘zbekiston hududi bo‘yicha avgust oyi uchun nisbatan qulay ob-havo sharoiti saqlanib turadi. Quruq va biroz issiq ob-havo bo‘lishi kutiladi. Faqat respublikaning ayrim tog‘li hududlarida momaqaldiroqli qisqa muddatli yomg‘ir yog‘ishi mumkin.
Havo harorati kunduz kunlari asosan 31-34° atrofida bo‘ladi, bu avgust oyining birinchi yarmi uchun bo‘lgan me’yoriy qiymatlardan biroz pastdir. Faqat haftaning eng oxiriga kelib, harorat 35-38° gacha ko‘tarilishi kutilyapti.
Respublikaning janubida va cho‘l zonalarida ayrim kunlarda ba’zi joylarda shamol 15-20 m/s gacha chang-to‘zonlar bilan kuchayishi kutiladi.
8 avgustda Namangan, Farg‘ona viloyatlarining tog‘ oldi va tog‘li hududlarida sel-suv toshqin hodisalari yuzaga kelishi mumkin, deb xabar beradi O‘zbekiston gidrometeorologiya xizmati markazi.
