Toshkentdagi tungi klubda pichoqlashish sodir bo‘ldi. Ikki kishi o‘ldi

Kun bo‘yi ishdan, o‘qishdan, kundalik tashvishlardan charchagan kishilarni tun o‘z bag‘rida allalaydi. Charchog‘larini yozib, ertangi kungi yumushlar, oilasi farovonligi uchun, yaratuvchanlik, bunyodkorlik, yurt ravnaqiga munosib hissa qo‘shmoq uchun barcha orom oladi. Kunduzgi shovqinlardan charchagan shahar ham sokinlik bag‘riga singadi. Yashash lazzatini anglagan har bir inson o‘z turmush tarzini ana shunday davom ettiradi. Ammo kelajakdagi maqsadi aniq bo‘lmagan, kattalarning nasihatini qulog‘iga ilmagan, hayotning qadriga yetmagan ba’zi yoshlar esa butun shahar va shaharliklarning halovatini buzadilar. Nafaqat o‘zgalar halovatini, o‘z hayotlarini, baxtu saodatlarini, yorqin kelajaklarini ham qorong‘ulikka itqitib, umr deya atalmish betakror va ulug‘ ne’matni afsus-nadomatga aylantiradilar.

Sobir (ismlar o‘zgartirilgan) 1997 yilda Farg‘ona viloyatida tug‘ilgan. O‘rta maxsus ma’lumotli bu yigit hali uylanmagan, vaqtincha ishsiz. Farg‘ona viloyati, Qo‘qon shahrida doimiy ro‘yxatda turadi, biroq Toshkent shahrida ijarada yashaydi.

Sardorbek ham 2002 yilda Farg‘onada tug‘ilgan, bugungi kunda Toshkentda do­imiy ro‘yxatda turadi va yashaydi.

Bu yigitlarning biri-biriga o‘xshashlik tomonlari bor: ayni kuch-quvvatga to‘lganda ikkalasi ham ishsiz. Sardorbekning yigitlik gashtini surishiga qaraganda o‘ziga to‘q oilaning farzandi. Bunday o‘ylashimizning boisi, ishsiz odamda pul bo‘lmaydi, pul topsayam uning qadriga yetadi, behudaga sarflamaydi. Bularga o‘xshab tunning qoq yarim kechasida tungi klublarda yurmaydi. Lekin Sobir o‘z uyini tashlab kelib, ijarada turib, bozorda qovun-tarvuz sotadi.

O‘sha kuni ham ularning har biri o‘zlariga o‘xshagan 4-5 nafar tanishlari bilan tungi soat 3:00 larda savdo majmuasiga borishadi. Sobir do‘stlari bi­lan binoning 3-qavatida joylashgan tungi klubga chiqadi. U yerda o‘zlaricha “hayot gashtini” surishadi: o‘yin-kulgi qilishadi, spirtli ichimlik ichishadi. Tun ham o‘tib, tong ota boshlagach, soat 5.30 larda hartugul ketish taraddudiga tushishadi. Yegan-ichganlarining esa pulini tulashni “unutishadi”. Ammo ularni bino oldida qo‘riqchilar to‘xtatishadi. Ular pul to‘lashlarini talab qilishar ekan, shirakayf yigitlarning ko‘zi klubdan chiqib kelayotgan ikki qizga tushadi. Ularni ko‘rib, to‘lashi kerak bo‘lgan pullarniyam “unutib” qizlarga gap ota boshlashadi. Ularni kurakda turmaydigan so‘zlar bilan “siylashadi”. Bu ham yetmaganday, tegajoqlik qila boshlashadi. Albatta, ularning beozoriliklariyu haqoratlariga qizlar ham jim turishmagach, yigitlarning “sherligi” tutadi.

... Shu kuni Sardorbek ham soat 19:00 larda tanishlari bilan savdo majmuasi binosining 2-qavatida joylashgan restoranga borib, u yerda 02:30 larga o‘tirishadi. Spirtli ichimlik ichib, keyin o‘tirishni davom ettirish uchun shu binoning yuqori qavatida joylashgan tungi klubga chiqishadi. U yerda shu klubda tanishgan bir nechta tanishlari bi­lan o‘tirib, spirtli ichimlik ichishni davom ettirishadi. Klub binosidan tanishlari bilan birga chiqib, bino oldida begona yigitlarning qizlar bilan janjallashayotganining ustidan chiqib qolishadi. Barchasi mast holatda bo‘lgan ikki guruh yigitlarining to‘qnashuvi taxmin qilinganidek fojiaga sabab bo‘lishi barchaga ayon. Shunday bo‘ldi ham.

Ichkilik shisha ichida jimgina turadi, insonning oshqozoniga tushgach esa uning o‘zi “shayton”ga aylanib, egasini “sher”ga aylantiradi.

Sardorbek va uning do‘stlari ham klub qo‘riqchilari bilan bahslashib turgan yigitlarning oldiga borib, ularning tortishuviga aralashishadi. Bu ham yetmagandek, qizlarning yonini olib, ularning “himoyachisi”ga aylanib, og‘izlaridan “bodi kirib, shodi chiqishi” bilan “sherlar jangi” boshlanadi...

Sardorbek Sobir va yana bir yigit bilan talashib-tortishib, ularga shikast yetkazadi.

Sobir urish-janjalni to‘xtatmoqchi, bezorilik harakatlarining oldini olmoqchi bo‘lgan Sardorbekning tanishlariga qarshilik ko‘rsatadi. Ularni qasddan o‘ldirish maqsadida yonida bo‘lgan oshxona pichog‘idan jinoyat quroli sifatida foydalanib, ushbu pichoq bilan ikki yigitning qorin qismi, ulardan birining o‘ng qo‘l yelka sohasiga bir marotaba, yana bir yigitning ko‘krak qafasi orqa yuzasiga ikki ma­rotaba urib, og‘ir tan jarohati yetka­zadi.

Shuningdek, Sobirning qotillik harakatlari bu bilan tugamaydi. U qarshi guruh yigitlarini qasddan o‘ldirish harakatida pichoq bilan hamla qilayotgan paytida, orqa tomondan yugurib kelib, janjalga aralashgan o‘zining do‘stini ham Sardorbekning tanishlaridan deb o‘ylab, qorniga pichoq uradi va og‘ir tan jarohati yetkazadi...

Pichoqlanganlarning ikki nafari o‘z vaqtida shifoxonaga olib boriladi va tibbiy yordam ko‘rsatiladi. Ammo ming afsuski, olingan tan jarohatlari natijasida qolgan ikki kishi vafot etadi: biri voqea joyida, ikkinchisi esa shifoxonada jon beradi.

Sudda yigitlardan birining qonuniy vakili apellyasiya shikoyatida, marhum uning yagona farzandi bo‘lgani, oyiga o‘rtacha 2-3 million miqdorida pul mablag‘i olib kelib turganini aytib, sudlanuvchi Sobirga umrbod ozodlikdan mahrum qilish jazosi tayinlab, yetkazilgan moddiy va ma’naviy zararni undirishni belgilashni so‘ragan.

Sobir 22 yilga, Sardorbek esa 5 yilga ozodlik­dan mahrum bo‘lishdi. 21 yoshli Sardorbek ayni yigitlik davrini qamoqda o‘tkazsa, afsus va nadomatlar bo‘lsinki, endigina 24 yoshni qarshilayotgan Sobir panjara ortidan chiqqanida umrining vaqt millari 40 dan oshib 50 ga tomon ketib, bong urayotgan, uning tengdoshlari hayotda ko‘zlagan maqsadlariga erishib, o‘g‘il uylantirib, qiz uzatib, nabira suyayotgan bo‘ladi. Essiz hayot, essiz umr...

Masalaning yana bir tomoni kishini o‘ylantiradi: mamlakatimizdagi barcha narsa uning ravnaqi va fuqarolarning baxti uchun xizmat qilishi kerak emasmi? Aslida xalqimizga tungi klublar kerakmi? Ularning yurtimizga nima foydasi bor? Aytish noqulay va nojioz bo‘lsa ham tungi klub degani ishratxona emasmi? U yerga faqat ichkilik ichish va maishat qilishni istaganlar kelishi bor gap-ku. Ichkilik avjiga chiqqan joyda esa urish-janjal bo‘­lishi va u albatta xunuk oqibatlar bilan yakunlanishi ham ayni haqiqat! Odob- axloqi, ta’lim-tarbiyasi yo‘q bo‘lgan yoshlarning huquqbuzarlik qilishlariga imkoniyat, shart-sharoit yaratib berayotganlar kimlar? Yoshlar xalqimizning ertasi va yuzi-ku! Holbuki, bu fojia tungi klublarda sodir bo‘layotgan ko‘ngilsizliklar, fojialarning birinchisi ham, oxirgisi ham emas. Unday joylardagi maishatbozliklardan keyin qanchadan-qancha yosh oilalar buziladi, qancha yoshlar umri xazon bo‘lar ekan, bu faqat Yaratganga ayon! Xulosa o‘zingizdan...

Xamidjon SHAMSHIYEV, Toshkent shahar sudining sudyasi,

Saodat Matyaqub qizi, muxbir