Toshkentdagi qurilish bozorida mojaro: aka-uka bir kishini do‘pposlashdi

Bozorga har kim o‘z rejasi, o‘z yumushi bilan keladi. Kimdir savdo-sotiq qilsa, kimdir uning xaridori. O‘rtadagi beminnat yordamchilar ham borki, ularning mehnati haqida eslamaslikning iloji yo‘q.

Ya’ni, yuk tashuvchilar, kuryerlar xizmati sotuvchi uchun ham, oluvchi uchun ham, nihoyatda zarur. Ammo... ular mushtumzo‘r bo‘lib chiqsa-chi?! Dodingizni kimga aytasiz?

O‘sha kuni Abror Nodirov (ism-shariflar o‘zgartirilgan) poytaxtimizning Olmazor tumani Usta Shirin ko‘chasida joylashgan “Story Mir” qurilish mollari bozoriga ishlagani chiqqanida kimdir uni do‘pposlab urishi, ish sudgacha borishini xayoliga keltiribdimi, deysiz.

Sudlanuvchi Hakim Yo‘ldoshev sud majlisida aybiga to‘liq iqror bo‘lib, 2014 yildan beri “Stroy Mir” qurilish bozorida kuryer bo‘lib ishlab kelishini, ya’ni bozordagi do‘konlarga firmalardan kerakli qurilish mollarini olib yetkazib berish bilan shug‘ullanishini, shu sababli deyarli kunora bozorga borib turishini aytdi. Sudlanuvchi bozorda uning akasi ham yuk mashinasida yuk tashish faoliyati bilan shug‘ullanishini aytdi.

Gap shundaki, voqea sodir bo‘lgan kuni Hakim bozorda jiyanining do‘koni yonida turgan bo‘ladi. Bir doimiy mijoz kelib jiyanining do‘konidan 2 dona panel mahsulotini oladi. Odatda, jiyanining do‘koni bo‘lganligi uchun u mijozlariga yukini yetkazib berishni akasiga topshirar edi.

Sud majlisida Hakim o‘sha mijoz do‘konning doimiy mijozlardan biri bo‘lib, akasi ko‘pincha yuklarini olib borib berganligini, shuning uchun shu safar ham uning yuklarini akasi olib borishini o‘ylab turganida o‘rtaga boshqa odam kelib qo‘shilganini, oqibatda janjal chiqqanini aytdi.

Jabrlanuvchi mijozning oldiga kelib, uning yuklarini olib borib berishini aytib, xizmat haqini kelisha boshlaydi. Mijoz unga 50 ming so‘m berishini aytadi. Yuk tashuvchi esa, 80 ming so‘m so‘raydi. Lekin jabrlanuvchi mijoz aytgan narxga boshqa yuk tashuvchini gaplashib berishini aytib, yana bir sherigi bo‘lgan yuk tashuvchini chaqiradi. Shunda voqeani kuzatib turgan Salimning bundan jahli chiqadi. Keyin Abror akaning yoniga borib nega uning ishlariga arlashayotganini so‘raydi. Shunda ularning o‘rtalarida kelishmovchilik yuzaga keladi. Daxanaki jang janjalga aylanib ketadi. Janjalga Salim Yo‘ldoshev ham aralashadi.

Jinoyat ishlari bo‘yicha Olmazor tuman sudi sayyor ochiq sud majlisida jabrlanuvchi va aybdorlar va ularning qonuniy vakillari, guvohlar ishtirokida jinoyat ishini ko‘rib chiqdi.

Jinoyat ishi jamiyatda yurish-turish qoidalarini qasddan mensimasdan buzish, bezorilik deya tavsiflandi. Sudda aybdorlarning ko‘rsatuviga ko‘ra, ular o‘sha kuni Abrorni urib-tepib, do‘pposlab, jabrlanuvchining sog‘lig‘i qisqa muddatli buzilishiga olib kelgan shikast yetkazishgani ma’lum bo‘ldi.

Bozorda norasmiy yuk tashuvchi bo‘lib ishlovchi aybdorlar sud majlisida qilmishlaridan chin ko‘ngildan pushaymonligini bildirishdi. Jabrlanuvchi esa, shifoxonada 10 kun davolanganligini, o‘sha kuni urib-tepishlar natijasida jigari ham lat yeganini aytdi. O‘sha kuni u janjal chiqishini istamaganini, buni ularga tushuntirganini aytdi. Mushtumzo‘r aka-ukalar esa, janjallashuvdan keyin ham tinchimay, uning orqasidan kelib yana gap talashganini, orqasidan yugurib kelib uni tepib, yerga ag‘darganligini, yiqilganidan foydalanib aka-uka uni yotgan joyida urib-tepib tashlashganligini esladi. Mushtumzo‘rlar jabrlanuvchini asosan bosh tomoniga urishganini aytdi. Jigariga ham tepishgani, u yerda dumalab yotgani uchun ularga qarshilik qila olmaganligini, o‘sha vaqtda atrofda deyarli hech kim yo‘q bo‘lganligini aytdi.

Uzoqroqdan odamlar ularni ajratishga kelgunicha aka-ukalar jabrlanuvchini tepkilab ketishadi. Atrofdagilar ularni ajratib, jabrlanuvchini shifoxonaga jo‘natadi.

Sud majlisida jabrlanuvchi sudlanuvchilar davolanishi mobaynida bir necha marotaba kasalxonaga kelib, undan xabar olib turganligini, agar xohlasa xususiy klinikada davolatishini aytganligi, bu vaqtda ahvoli og‘irligi uchun bunga rozi bo‘lmaganligini aytdi. Biroq u tan jarohati olganligi sababli ishga ham chiqa olmaganligini, kunlik topadigan daromadlari ham to‘xtab qolganligini, davolanish xarajatlarini ukasi qoplaganligini, shifokor unga yana 2 oy ishga chiqmasdan davolanishini aytganligini bildirdi.

Sudlanuvchilar esa, unga hech qanday moddiy yordam bermaganligini, faqatgina sud jarayonida unga yetkazilgan zarar sudlanuvchilar tomonidan to‘liq qoplanganligini, shu sababli uning sudlanuvchilarga nisbatan da’vosi yo‘qligini bildirib, suddan sudlanuvchilarga nisbatan yengillik berilishini so‘radi.

Sud-tibbiy ekspertizasining xulosasiga ko‘ra, jabrlanuvchi bosh miya yopiq jarohati, bosh miya chayqalishi, burun suyaklarining yopiq sinib, suyak bo‘laklarining qoniqarli turishi, bosh chakka sohasi, burun egar sohasi, o‘ng yelka bo‘g‘imi sohasi, o‘ng qo‘l kaft sohasi, ko‘krak qafasi o‘ng tomoni va o‘ng tizza bo‘g‘imi sohasi yumshoq to‘qimalari lat yeyishi oqibatida uning sog‘lig‘i qisqa muddatga buzilishiga olib kelgan yengil darajadagi tan jarohati olganligi aniqlandi.

Sud guvohlarning, jabrlanuvchining va sudlanuvchilarning ko‘rsatmalarini tinglab, sud-ekspertiza xulosasi boshqa dalillarni inobatga olib, odilona hukm chiqardi. Sudlanuvchilar O‘zbekiston Respublikasining Jinoyat kodeksi 277-moddasi ikkinchi qismi “b” bandida nazarda tutilgan jinoyatni sodir etganlikda aybli deb topildilar.

Ularning har ikkisiga ham 2 yil ozodlikni cheklash jazosi tayinlandi. Ozodlikni cheklash jazosini yashash joyida soat 22:00 dan 6:00 ga qadar o‘tash belgilandi.

Hukm qonuniy kuchga kirgandan so‘ng yashash joyini hukmning ijrosini nazorat qiluvchi organ ruxsatisiz o‘zgartirmaslik, muayyan joylar — choyxona, kafe, bar, restoranlarga bormaslik, O‘zbekiston Respublikasi hududidan tashqariga chiqmaslik, alkogolli ichimliklar iste’mol qilmaslik taqiqlari qo‘yildi.

Mirziyod ABIDOV,

Jinoyat ishlari bo‘yicha Olmazor tuman sudi sudyasi