Tibbiyot muassasalariga ishga joylashtirib qo‘yishni va’da qilgan shaxslar ushlandi

Bosh prokuratura huzuridagi Departamentning To‘rtko‘l tuman bo‘limi tomonidan o‘tkazilgan tezkor tadbirda, tuman Tibbiyot birlashmasiga qarashli markaz bo‘limi bekasi B.A. fuqarolar X.N. va N.I.ning ishonchiga kirib, ularni go‘yoki yuqori lavozimda ishlovchi tanishlari yordamida 2 400 AQSh dollari evaziga ushbu tibbiyot birlashmasiga ishga joylashtirib qo‘yishni va’da qilib, shundan 200 AQSh dollarini qo‘lga kiritib, qolgan 2 200 AQSh dollarini olgan vaqtida ashyoviy dalillar bilan ushlangan.

Shu kabi, Departament hamda DXXning Amudaryo tumani bo‘limlari tomonidan IIV xodimlari bilan hamkorlikda o‘tkazilgan tezkor tadbirda, tuman Tibbiyot birlashmasiga qarashli tug‘ruqxona navbatchi akusheri SH.X. fuqaro G.Y.ni go‘yoki yuqori lavozimda ishlovchi tanishlari yordamida ushbu tibbiyot birlashmasiga hamshira vazifasiga ishga joylashtirib qo‘yish evaziga 1 600 AQSh dollarini olgan vaqtida ashyoviy dalillar bilan ushlangan.

Departamentning Taxiatosh tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda, Ko‘z mikroxirurgiyasi markazi mintaqaviy filialiga qarashli maslahat poliklinikasi bekasi A.D. fuqaro N.N.ning ishonchiga kirib, uni go‘yoki yuqori lavozimda ishlovchi tanishlari yordamida Nukus shahridagi poliklinikaga hamshira vazifasiga ishga joylashtirib qo‘yish evaziga 10 mln so‘mni olgan vaqtida ashyoviy dalillar bilan ushlangan.

Departamentning Uychi tuman bo‘limi tomonidan o‘tkazilgan tezkor tadbirda esa, Namangan shahridagi oilaviy poliklinika hamshirasi N.R. fuqaro YO.O‘.ni ushbu poliklinikaga ishga kiritib qo‘yish evaziga 700 AQSh dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.