Shoir Bobur Bobomurod Farhod va Shirinni sudga berdi

Adliya vazirligi huzuridagi Intellektual mulk agentligiga fuqaro Bomuradov Bobir Hodiyevich (Bobur Bobomurod) ning she’riy asarlarga nisbatan mualliflik huquqlari buzilganligi hamda unga tegishli bo‘lgan «Farhod va Shirin» xizmat ko‘rsatish belgisidan huquq egasining roziligisiz hech qanday shartnoma tuzilmasdan foydalanilayotganlik holati yuzasidan tegishli chora ko‘rish to‘g‘risidagi murojaati kelib tushgan. Bu haqda O‘zbekiston Respublikasi Adliya vazirligi huzuridagi Intellektual mulk agentligi xabar bermoqda.

Murojaatda keltirilgan holatlarni o‘rganish jarayonida fuqarolar S. F. hamda Z. SH. tomonidan muallif B. Bobomurodovga tegishli bo‘lgan «Qalbim bahori», «Hayot» nomli she’riy asarlarni muallif bilan hech qanday shartnoma tuzilmasdan huquq egasining ruxsatisiz barchaning e’tiboriga yetkazilganligi va omma oldida ijro etilganligi aniqlandi.

Vaholanki, O‘zbekiston Respublikasining «Mualliflik huquqi va turdosh huquqlar to‘g‘risida»gi Qonunining 6-moddasiga ko‘ra adabiy asarlar mualliflik huquqi ob’ektlaridan biri hisoblanadi va qonun bilan himoya qilinadi.

Shuningdek, Qonunning 19-moddasiga asosan muallif asardan har qanday shaklda va har qanday usulda foydalanishda, xususan asarni barchaning e’tiboriga yetkazish, asarni omma oldida ijro etishda mutlaq huquqlarga ega.

Asardan daromad olish maqsadida foydalanilganligi yoki undan foydalanish bunday maqsadga qaratilmaganligidan qat’i nazar, asardan foydalanilgan deb hisoblanadi.

Qonunning 62-moddasiga ko‘ra huquq egasi bilan shartnoma tuzmasdan asarlar yoki turdosh huquqlar ob’ektini takrorlash, tarqatish yoki undan boshqacha tarzda foydalanish mualliflik huquqini buzish hisoblanadi.

Bundan tashqari, Agentlik tomonidan B. Bobomurodov tomonidan taqdim etigan hujjatlarni o‘rganish natijasida yuqorida keltirilgan fuqarolar tomonidan o‘z xonandalik faoliyatida foydalanilayotgan «FARHOD va SHIRIN» so‘zi B. Bobomurodovga tegishli bo‘lgan MGU 43187-son «FARHOD va SHIRIN» xizmat ko‘rsatish belgisi bilan o‘xshashligi aniqlandi.

«Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida»gi Qonunning 26-moddasiga muvofiq tovar belgisi va xizmat ko‘rsatish belgisining egasi tovar belgisidan foydalanish va uni tasarruf etish mutlaq huquqiga ega bo‘lib, tovar belgisi va xizmat ko‘rsatish belgisini yoki shu belgi bilan belgilangan tovarni ruxsat berilmagan tarzda tayyorlash, qo‘llash, olib kirish, savdoga taklif etish, sotish, o‘zgacha tarzda fuqarolik muomalasiga kiritish yoki ularni shu maqsadda saqlash yoxud ular bilan adashtirib yuboradigan darajada aynan o‘xshash bo‘lgan bir xildagi tovarlarni belgilash tovar belgisiga doir mutlaq huquqni buzish deb e’tirof etiladi.

Yuqoridagilarga asosan, fuqaro S.F. hamda Z.SH.ning harakatlarida O‘zbekiston Respublikasi Ma’muriy javobgarlik to‘g‘risidagi kodeksining 177-moddasining birinchi qismida va 177(1)-moddasining birinchi qismida belgilangan asardan qonunga xilof ravishda foydalanish holati hamda huquq egasiga tegishli bo‘lgan tovar belgisidan o‘z xonandalik faoliyatida foydalanayotganligi sababli Agentlik tomonidan holat bo‘yicha ma’muriy javobgarlik to‘g‘risidagi bayonnoma rasmiylashtirilib, tegishli sudga yuborildi.