“Real”ga qaysi futbolchi kerak?

Ayni damda ko‘pchilikning diqqat markazida “Real”ning transfer maqsadlari turibdi. Boisi bu mavsumda “qirollik klubi”ning o‘yinida keskin pasayish kuzatildi, hatto Yevropa Chempionlar ligasi finaliga chiqqani ham “Real”ning o‘yini susayganini inkor eta olmaydi. Shu bois ko‘pchilikni Madrid jamoasi yozda kimni xarid qilarkin, degan savol o‘ylantirayotgani tabiiy.

BIRINCHI VARIANT — SALOH

Shak-shubhasiz, “Liverpul” hujumchisi juda iqtidorli. Driblingi joyida, zarbalari ham zargarona. Bunday futbolchi “Real”da bemalol o‘ynab keta oladi. Ammo bir jihatni ta’kidlash kerakki, Saloh — qanot hujumchisi. Agar u “Real”ga o‘tadigan bo‘lsa, Zidanning asosiy muammosi muammoligicha qolaveradi — jamoaga markaziy hujumchi kerak. Ehtimol, bunda fransiyalik mutaxassis Krishtianu Ronalduning orzusini ro‘yobga chiqarishi mumkin, ya’ni portugaliyalik hujumchini markazga qo‘yib, ikki qanotga Saloh va Asensioni o‘ynatish varianti ham bor unda. Ammo ayni damda Ronalduning markaziy hujumda qanchalik muvaffaqiyatli o‘ynay olishi ham topishmoqdek gap. Chunki uning jismoniy imkoniyatlari ayni damda pand berib qo‘yishi mumkin. Axir markaziy hujum chizig‘i ham oson emas, raqiblarning tezkor himoyachilarini ortda qoldirish mushkul ish. Ronalduning bir ustun tomoni bor — bosh bilan harakat qilish. Ammo har doim ham bunga imkon bo‘lavermaydi. Shu bois Zidan tavakkal qilmasa kerak.

Qolaversa, “qizillar” Muhammad Saloh uchun juda ko‘p pul so‘rashyapti, talablari ham katta. So‘nggi xabarlarga ko‘ra, “Liverpul” misrlik futbolchi uchun “Real”ning 4 nafar futbolchisi — Keylor Navas, Dani Sebalyos, Lukas Vaskes va Marko Asensiolarni so‘ragan. Vaholanki, Asensio uchun “PSJ” “Real”ga 150 mln yevro taklif qilgandi. Salohning narxi esa 200 mln yevroga teng. Xullas, “Real” yuqoridagi futbolchilar yoki umuman juda katta talab evaziga Salohni xarid qilgandan ko‘ra o‘sha mablag‘ yoki imkoniyatga ikkita-uchta yaxshiroq futbolchi olgani ma’qul. Masalan, Asensioni jamoada olib qolib, Sebalyos va Vaskesning o‘rniga yana bitta yaxshiroq futbolchi olsa bo‘ladi. Shunda Navas ham klubda qoladi. Umuman, Saloh varianti “Real” uchun noma’qulroq bo‘lib turibdi. Shuningdek, misrlik hujumchining o‘zi ham “Real”ga o‘tish ishqida yonayotgani yo‘q.

IKKINCHI VARIANT — NEYMAR

Ayni paytda “PSJ” hujumchisi Neymarning “Real”ga o‘tishi haqidagi xabarlar har doimgidan-da kuchaygan. Xo‘sh, agar Neymar “qirollik klubi”ga o‘tsa, bu qanchalik foyda beradi? Birinchidan, Zidan markaziy hujumchi muammosidan qutuladi, Neymar markazda bemalol o‘ynay oladi.

Qolaversa, braziliyalik futbolchining otasi o‘g‘lining asl maqsadi “Real” bo‘lganini ta’kidlab o‘tdi. Ya’ni Neymarning o‘zi ham Salohdan farqli ravishda Madrid jamoasi libosini kiyishga ishtiyoqmand. Ammo bu klubda yaxshigina muammoga sabab bo‘lishi mumkin. Ya’ni Neymar jamoada birinchi bo‘lishga o‘rgangan, biz buni “PSJ”da ko‘rdik va ko‘ryapmiz. U bosh murabbiyning boshqa futbolchini o‘zidan yuqori qo‘yishini hazm qila olmaydi. Kavani bilan o‘rtasidagi mojaro ham shu xarakteri tufayli kelib chiqdi. Agar u “Real”ga o‘tsa, shunday muammo yuzaga chiqadi agar Neymar xulqini o‘zgartirmasa. Chunki Zidan Neymar kelgach, Ronalduni ikkinchi darajali futbolchiga aylantirib qo‘ymaydi.

Biroq Florentino Peresga buning ahamiyati yo‘q. U har qanday vaziyatda istalgan futbolchidan manfaat yo‘lida voz kechib keta oladigan inson. Chunki u — biznesmen. Biznesda esa shaxs qadri birinchi o‘rinda turmaydi. Peres uchun Neymarning transferi ham biznes — g‘alabalar, sovrinlar va ularning ortidan keladigan pullar. Shuning uchun ham braziliyalik futbolchining “qirollik klubi” a’zosiga aylanishi imkonsiz holat emas. Ammo ayni haqiqat shuki, Neymarning transferi “Real”ning markaziy hujumdagi muammosini hal qilishi haqiqatga yaqinroq.

UCHINCHI VARIANT — KEYN

Xarri Keyn oxirgi vaqtlarda o‘yini o‘xshab qolgani uchun yulduzga aylangan futbolchi. U barqaror o‘yin ko‘rsatadigan hujumchi emas. Biroq uning “Real”ga mos keladigan jihatlari ko‘p — sof imarkaziy hujumchi, sovuqqon, zarbalari kuchli, golni yaxshi seza oladi. Ammo bizningcha La Ligaga uning to‘liq moslashib ketishi va “Tottenxem”dagi kabi to‘purarga aylanishi biroz mushkulroq. Chunki La Liga — istalgan yulduzni qaytib porlamaydigan darajada yutib yuborish tajribasiga ega.

Ikkinchi tomondan, “shporlar” Keyn uchun shunchalik katta narx so‘rashyaptiki, “Real” hujumchini sotib olishga botinolmayapti. Tan olish kerak, angliyalik hujumchi yetarlicha iqtidorga ega, ammo unga belgilangan narx keragidan ancha yuqori. Hozirgi holatda Xarri Keynning narxi nari borsa 150 mln yevro, lekin “Tottenxem” rahbariyati uni 200 mln yevrodan kamiga sotmoqchi emas, bu chinakam katta mablag‘.

TO‘RTINCHI VARIANT — LEVANDOVSKI

“Bavariya” hujumchisi “Real”ga mos tushadi. U o‘sha “Real” darvozasiga 4 ta gol urganidan keyin barqaror o‘yin ko‘rsatmoqda. Qolaversa, Myunxen klubi ham hujumchini juda qimmat narxlamagan, agar “Real” astoydil istasa 100 mln yevroga Levandovskini xarid qilishi mumkin. Ammo negadir Florentino Peres buni unchalik istamayapti. Aftidan, u polshalik hujumchini “ishlatib bo‘lingan tovarlar” ro‘yxatiga kiritdi, shekilli, undan foyda yo‘q deb hisoblamoqda. Lekin Levandovski hech bo‘lmaganda 2 yil “Real”ga foyda keltira oladi.

Umumiy olganda, “Real” qiziqayotgan hujumchilar soni juda ko‘p. Biz shunchaki ularning orasida ko‘proq mish-mish tarqalganlari haqida fikr bildirdik. Ko‘ramiz, yozda Florentino Peres Zidan bilan birgalikda qanday xaridlarni amalga oshirisharkin? Nima bo‘lganda ham, “Real” bu safar transfer bozorida “portlash” qilsa, ajab emas.