2040 yilda 33 ta mamlakat suv tanqisligiga duch keladi

2040 yilga borib, dunyoning 33 ta mamlakati jiddiy suv tanqisligiga duch kelishi mumkin, ular orasida Turkiya ham bor, deb xabar beradi Anadolu agentligi.

Aholi sonining o‘sishi, iqlim o‘zgarishi va iste’molning ortishi suv resurslariga bosimni oshirib, suv xavfsizligini asosiy global muammolardan biriga aylantirmoqda.

Prognozlarga ko‘ra, 2040 yilga borib, 33 ta mamlakat "haddan tashqari suv stressi" zonasiga tushadi. Jahon resurslari instituti (WRI) tomonidan 167 ta mamlakatni qamrab olgan tadqiqot shuni ko‘rsatdiki, aholining o‘sishi, urbanizasiya va iqlim o‘zgarishi fonida suv resurslari tez kamayib bormoqda.

Vaziyat, ayniqsa, Yaqin Sharqda qiyin. Bu yerdagi suv xavfsizligi darajasi dunyodagi eng past ko‘rsatkichlardan biri. Ko‘pgina mamlakatlar dengiz suvini tuzsizlantirish uchun yer osti suvlari va qimmat texnologiyalarga bog‘liq. Bunday inshootlarga zarar yetkazilgan taqdirda, masalan, harbiy mojarolar paytida millionlab odamlar ichimlik suvidan mahrum bo‘lishlari mumkin.

Avvalroq, Turkiya prezidenti Rejep Tayyip Erdog‘an kelajakda davlatlar o‘rtasida neft emas, balki suv tufayli mojarolar kelib chiqishi mumkinligini ta’kidlagan edi. U suv resurslari tobora strategik ahamiyatga ega ekanligini ta’kidladi.

Mutaxassislarning fikriga ko‘ra, suv tanqisligi nafaqat ekologik muammo, balki iqtisodiyot, oziq-ovqat xavfsizligi, energetika va migrasiya jarayonlariga bevosita ta’sir qiladi. Hozirgi kunda dunyo aholisining qariyb yarmi yiliga kamida bir oy suv tanqisligini boshdan kechirmoqda.

YUNESKO ma’lumotlariga ko‘ra, 2 milliarddan ortiq odam xavfsiz ichimlik suvidan, 3 milliarddan ortiq odam esa asosiy sanitariya xizmatlaridan foydalana olmaydi.

Mutaxassislarning ta’kidlashicha, suv resurslarini samarali boshqarish va barqaror yechimlarsiz vaziyat yanada yomonlashishi, dunyoning ko‘plab mintaqalarida ijtimoiy va iqtisodiy beqarorlikni kuchaytirishi mumkin.