Ronaldu Arab chempionlar kubogidagi gollari legitimligi haqidagi postga munosabat bildirdi

«An-Nasr» hujumchisi Krishtianu Ronaldu ijtimoiy tarmoqdagi muxlislar sahifasida e’lon qilingan, uning 2023 yilda Arab chempionlar kubogida urgan olti golining legitimligi tan olinishi haqidagi postga izoh qoldirdi.

Hozirgi vaqtda FIFA mazkur musobaqaning rasmiy maqomiga aniq ta’rif bermagani sababli, turli statistik saytlarda Ronalduning gollari bo‘yicha turlicha ma’lumotlar keltirilmoqda. Ayrim manbalar portugaliyalik futbolchining faoliyati davomida 967 emas, balki 961 ta gol urganini ko‘rsatgan.

Muxlislar akkauntida quyidagicha yozilgan:

«Ko‘pchilik mendan Krishtianu Ronaldu 2023 yilda «An-Nasr» safida o‘ynagan Arab chempionlar kubogi haqida so‘radi. Ushbu musobaqaning rasmiy maqomi bor-yo‘qligi borasida tushunmovchiliklar tufayli, TNT Sports va ESPN kabi resurslar yoki Fabrisio Romano kabi jurnalistlar odamlarni chalg‘itdi.

Aslida esa, FIFA boshidanoq bu titulni rasmiy deb tan olgan. Ushbu sovrin, shuningdek, undagi Krishtianuning gollari ham uning umumiy statistikasiga qo‘shiladi. Uning 967 ta golidan birortasi ham “o‘chirilmaydi”.

Mening maslahatim: faktlarni tekshiring. Internetda ko‘rgan har bir narsangizga ishonaveramang — hammasi ham haqiqat emas. Ba’zida bu shunchaki bir tomonlama jurnalistlarning yolg‘on materiallari bo‘lishi mumkin».

Ronaldu esa ushbu post ostida shunday izoh qoldirdi: «Qabul qilish — bu fazilat».