Raqobat qo‘mitasiga fuqarolardan gaz ta’minotiga oid 1500 ga yaqin e’tirozli murojaat kelib tushgan

Raqobat qo‘mitasi axborot xizmati fuqarolardan gaz ta’minotiga oid 1500 ga yaqin e’tirozli murojaatlar kelib tushganini ma’lum qildi.

Murojaatlar iste’molchilarga yetkazib berilayotgan tabiiy gazning sifatsizligi, suyultirilgan gazni muddatida yetkazilmaslik, ko‘rsatilmagan xizmatlar uchun asossiz qarzdorlik hisoblash, tabiiy gaz hisoblagich uskunasini o‘rnatish va davlat qiyoslovidan o‘tkazish kabi masalalarda bo‘lgan.

Ta’kidlanishicha, Qo‘mita iste’molchilarning qonuniy huquq manfaatlarini himoya qilib kelmoqda.

Samarqand viloyati misolida

Hududiy boshqarma Ishtixon tumanidan N.B.ning gaz bosimi pastligi, Payariq tumanida istiqomat qiluvchi fuqaro J.Q.ning suyultirilgan gaz baloni o‘z vaqtida yetkazilmayotganligi va Kattaqo‘rg‘on shahrida istiqomat qiluvchi U.M.ning muntazam to‘lovlarni amalga oshirishiga qaramasdan qarzdorlik ortayotgani kabi noroziliklar bildirilgan murojaatlarini o‘rganib chiqdi.

O‘rganishlar va qayta qilingan hisob-kitoblar jarayonida murojaatlarda keltirilgan shikoyatlar asosligi ma’lum bo‘ldi hamda hududiy boshqarmaning Maxsus komissiyasi tomonidan «HUDUDGAZ SAMARQAND» gaz ta’minoti filialiga nisbatan ish qo‘zg‘atilib, mavjud aniqlangan kamchiliklarni bartaraf etish yuzasidan ko‘rsatma berildi.

Jizzax viloyati misolida

Jizzax viloyat hududiy boshqarmasiga gaz ta’minoti bo‘yicha kelgan murojaatlardan biri «YUG SEVER STROY» MCHJga tegishli bo‘ldi.

O‘rganishlar jarayonida «ZARBDORTUMANGAZ» gaz ta’minoti filiali tomonidan mazkur MCHJga 121 757 550 so‘m miqdoridagi asossiz qarzdorlik hisoblangani aniqlandi.

Natijada Maxsus komissiya tomonidan «Raqobat to‘g‘risida»gi Qonun talablaridan kelib chiqib, «HUDUDGAZTA’MINOTI» AJ va «HUDUDGAZ JIZZAX» gaz ta’minoti filialiga nisbatan ish qo‘zg‘atilib, murojaatda keltirilgan 121 757 550 so‘m mablag‘ni to‘liq «YUG SEVER STROY» MCHJning foydasiga qayta hisob-kitob qilish bo‘yicha bajarilishi majburiy bo‘lgan ko‘rsatma berildi.

Toshkent viloyati misolida

Raqobat qo‘mitasiga Call-center orqali fuqaro xonadonidagi gaz hisoblagichini yangi elektron hisoblagichga almashtirish masalasida amaliy yordam so‘rab murojaat yo‘llagan.

Hududiy boshqarma tomonidan o‘rganishlar olib borilganda masala gaz ta’minoti xodimlari tomonidan hal etilmagani, fuqaroning bugungi kunda hisoblagich sotib olish uchun sharoiti yo‘qligi ma’lum bo‘ldi.

O‘rganish natijasida fuqaroga «OLMALIQSHAHARGAZ» gaz ta’minoti bo‘limi tomonidan yangi zamonaviy G-4 rusumli elektron gaz hisoblagich o‘rnatib berilishi ta’minlandi.

Andijon viloyati misolida

Hududiy boshqarmaga Andijon shahar istiqomat qiluvchi fuqaro B.T. tomonidan kelib tushgan murojaatda foydalanilgan tabiiy gaz iste’moli uchun «HUDUDGAZ ANDIJON» gaz ta’minoti filiali tomonidan asossiz 4 600 000 so‘m qarzdorlik hisoblanganligidan norozi bo‘lib murojaat yo‘llangan.

Murojaat to‘lov qog‘ozlari va qayta hisob-kitoblar asosida o‘rganilganda iste’molchining foydalangan gazdan qarzdorligi yo‘qligi ma’lum bo‘ldi va mazkur xonadonga qo‘yilgan mazkur qarzdorlik bartaraf etildi.

Buxoro viloyati misolida

Fuqaro A.T. hududiy boshqarmaga murojaat yuborib, o‘zi istiqomat qilayotgan uyda gaz hisoblagich ishlamayotgani, bu haqda xizmat ko‘rsatuvchi korxonaga murojaat qilgani, shunga qaramasdan 18,7 mln so‘m hisoblanayotgani, ushbu masalada amaliy yordam so‘ragan.

Hududiy boshqarmaning olib borilgan o‘rganish natijasida «BUXORO SHAHAR GAZ» gaz ta’minoti filiali tomonidan fuqaroga hisoblagichi nosozligi haqida dalolatnoma tuzilgan, asossiz hisoblangan qarzdorlik qayta hisob-kitob qilinib, uning foydalangan gazga to‘lovi 1,8 mln so‘m hisoblanib, ortiqcha 16,9 so‘m asossizligi sababli iste’molchining hisob varag‘idan chiqarildi.

Qoraqalpog‘iston Respublikasi misolida

Qoraqalpog‘iston Respublikasi Raqobatni rivojlantirish va iste’molchilar huquqlarini himoya qilish qo‘mitasiga Nukus shahar «ALMAZAR» MFYda yashovchi fuqaro S.B.dan, Nukus shahar yashovchi fuqaro Q.D.lardan «HUDUDGAZ QORAQALPOG‘ISTON» gaz ta’minoti filiali bilan qayta hisob-kitob qilish masalasida amaliy yordam so‘rab murojaat qilishgan.

Ushbu murojaatlar «NUKUSSHAHARGAZ» gaz ta’minoti bo‘limi bilan o‘rganib chiqilganda, fuqaro S.B. hisob raqamiga 7 161 669 so‘m qarzdorlik, fuqaro Q.D.ga esa 4 200 000 so‘m qarzdorlik borligi aniqlandi.Olib borilgan qayta hisob-kitoblar mazkur qarzdorliklar asossiz ekanligini ko‘rsatdi va murojaat iste’molchi foydasiga hal etildi.

Qashqadaryo viloyati misolida

Hududiy boshqarmaga Qarshi tumanida istiqomat qiluvchi fuqaro E.E. gaz bo‘yicha Qarshi shahar majburiy ijro byurosi tomonidan qarzdorlikni undirish bo‘yicha qaror qabul qilinganidan norozi bo‘lib murojaat yo‘llagan.

O‘rganishlarda fuqaro Qarshi tumanida yashashi va unga 261 000 so‘m qarzdorlik chiqarilgani hamda MIBning qarori bilan ham tanishib chiqildi. Natijada qarzdorlikka ega abonent raqami boshqa bir fuqaroga tegishli ekanligi, ta’minot xodimlarining mas’uliyatsizligi sababli dasturda xatolik yuzaga kelgani aniqlandi hamda murojaatchi nomidagi qarzdorlik bartaraf etilib, MIB qarori o‘zgartirildi.

Xorazm viloyati misolida

Hududiy boshqarmaga fuqaro X. N. Urganch tumani «OQMAKTAB» mahallasida joylashgan xonadoni uchun 4 137 060 so‘m asossiz qarzdorlik yuklatilganligi yuzasidan murojaatini bergan.

O‘rganishlarda xonadon 2022 yil avgust oyida sotib olingani, bugungi kunda xonadoniga yangi hisoblagich o‘rnatilgani, ammo shunga qaramay bu xonadonda tabiiy gaz mavjud emasligi, eski hisoblagichi bo‘yicha to‘lovlar to‘liq amalga oshirilib, to‘xtatilgani ma’lum bo‘ldi.

Shundan so‘ng asossiz hisoblangan 4 137 060 so‘m fuqaro foydasiga qayta hisob-kitob qilinib, mazkur xonadon tabiiy gaz tizimiga ulandi.

Navoiy viloyati misolida

Raqobat qo‘mitasining ishonch telefoniga Navoiy shahrida istiqomat qiluvchi fuqarolar A.A. va R.U. gaz ta’minoti korxonasi tomonidan xonadoniga yangi elektron gaz hisoblagich o‘rnatib berish kechikayotganligi yuzasidan murojaatlari kelib tushgan.

Hududiy boshqarma tomonidan murojaat o‘rganib chiqildi. Xususan, O‘zbekiston Respublikasi Prezidentining 2019 yil 9 iyuldagi PQ-4388-sonli qaroriga asosan tabiiy gazni nazorat qilish va hisobga olishning avtomatlashtirilgan tizimini barcha turdagi iste’molchilar uchun to‘liq joriy etish belgilab berilgan.

Mazkur Farmonga asosan «HUDUDGAZ NAVOIY» gaz ta’minoti filiali tomonidan fuqarolar xonadoniga yangi elektron gaz hisoblagich o‘rnatib berilishi ta’minlandi.

Namangan viloyati misolida

Namangan shahrida yangi qurilgan ko‘p qavatli uylardan xonadonlar sotib olgan 3 nafar fuqaro ta’minotchi korxona tomonidan uylariga gaz hisoblagich o‘rnatilmaganligidan norozi bo‘lib qilgan murojaatlari Namangan viloyati hududiy boshqarmasi tomonidan o‘rganib chiqildi.

O‘rganish davomida murojaatda keltirilgan ko‘p qavatli uylar Namangan shaharda joylashgan bo‘lib, «SAMO BUILD-14» MCHJ tomonidan qurilib, fuqarolarga topshirilganligi aniqlandi.

Natijada «HUDUDGAZ NAMANGAN» gaz ta’minoti filiali xodimlari va quruvchi «SAMO BUILD-14» MCHJ xodimlariga «Iste’molchilar huquqlarini himoya qilish to‘g‘risida»gi Qonunning 19-21-moddalari yuzasidan tegishli tushuntirishlar berilib, natijada murojaatchilar xonadoniga gaz hisoblagichlar o‘rnatib berilishiga erishildi.

Sirdaryo viloyati misolida

Hududiy boshqarmaga Boyovut tumanida istiqomat qiluvchi fuqaro A.A.dan tushgan murojaatda «BOYOVUT TUMAN GAZ» ta’minoti filiali tomonidan 1 039 680 so‘m miqdorida qarzdorlik hisoblanganidan noroziligini bildirgan.

O‘rganishlarda fuqaroga nisbatan gaz ta’minoti filiali yashash xonadoniga loyihadan tashqari jihozlar o‘rnatilgan, degan vaj bilan dalolatnoma rasmiylashtirgani, ammo haqiqatda bu xonadonda loyihaga kirmagan jihozlar mavjud emasligi ma’lum bo‘ldi.

Natijada «BOYOVUT TUMAN GAZ» ta’minoti bo‘limi tomonidan «Iste’molchilar huquqlarini himoya qilish to‘g‘risida»gi Qonunning 21-moddasi talablariga zid ravishda dalolatnoma rasmiylashtirilganligi aniqlanib, fuqaroga nisbatan rasmiylashtirilgan dalolatnoma bekor qilinishi va 1 039 680 so‘m miqdoridagi noreal qarzdorlik olib tashlanishi ta’minlandi.

Surxondaryo viloyati misolida

Hududiy boshqarma tomonidan fuqaro X.M.ning qo‘mitaga «pm.gov.uz» orqali qilgan murojaati o‘rganib chiqildi.

O‘rganish davomida xonadonni gaz loyihasi tayyorlangandan so‘ng, «TERMIZSHAHARGAZ» ta’minoti bo‘limi tomonidan 2024 yil 22 avgust kuni qayta dalolatnoma rasmiylashtirilib, loyihadan tashqari 2 ta nuqta borligini asos qilib «TERMIZSHAHARGAZ» ta’minoti bo‘limi xodimlari tomonidan tabiiy gaz uchun 1 900 000 so‘m qarzdorlik hisoblanganligi aniqlandi.

Shuningdek, iste’molchining tabiiy gaz uchun amalga oshirgan to‘lovlari qayta hisob-kitob qilinganda qarzdorlik 918 000 so‘mni tashkil qilgan, qolgan 982 000 so‘mlik qarzdorlik asossiz bo‘lib chiqdi va mazkur xonadonning hisob-varag‘idan olib tashlandi.