Qishda eng ko‘p kutilayotgan transferlar

2025 yilning yanvar oyida amalga oshishi kutilayotgan bir qator transferlar bilan tanishtirib o‘tamiz.

«MYu» Reshford bilan xayrlashmoqchi
«Manchester Yunayted» va Markus Reshfordning hamkorligi yangi murabbiy Ruben Amorim bilan yaxshi o‘xshamadi. Amorim futbolchining professional munosabatidan qoniqmagani sababli, Reshford jamoa tarkibidan chetlatildi. The Guardian xabariga ko‘ra, klub futbolchini qishda sotishga tayyor. Saudiya Arabistonining bir nechta klublari futbolchiga qiziqish bildirgan, biroq Reshford Yevropadan ketishni rejalashtirmayapti.

Pogbaning kelajagi
Fransuz yarim himoyachisi Pol Pogba «Yuventus»ni tark etdi. U 2025 yilning mart oyida diskvalifikasiya muddati tugagach, maydonga qaytishi mumkin. Bolavip xabariga ko‘ra, Pogba Braziliyaning «Korintians» jamoasiga o‘tishga rozilik bildirgan, biroq RMC Sport ma’lumotiga ko‘ra, u «Marsel»ga o‘tishni ko‘rib chiqmoqda.

Gvardiolaga yordam keladi
«Manchester Siti» yarim himoyani kuchaytirish uchun qishda futbolchi sotib olishni rejalashtirmoqda. ESPN xabariga ko‘ra, klubning asosiy maqsadlari — Martin Subimendi («Real Sosyedad») va Bruno Gimarayesh («Nyukasl»). Shuningdek, jamoa himoyachi va hujumchi sotib olish imkoniyatini ham ko‘rib chiqmoqda.

«Yuventus» yangi transferlar qiladi
«Yuventus» qiyin mavsumni kuchli transferlar orqali o‘nglashga harakat qilmoqda. Klub Jakomo Raspadori («Napoli»), Sandro Tonali («Nyukasl») va David Gansko («Feyenoord») kabi futbolchilarni sotib olishni rejalashtiryapti.

«Liverpul»ga qanot himoyachilari kerak
Trent Aleksandr-Arnoldning shartnomasi uzaytirilmagani sababli, «Liverpul» uning o‘rniga «Bayer» himoyachisi Jeremi Frimpongni olishga qiziqmoqda. Shuningdek, mersisaydliklar Alfonso Devis («Bavariya») va Rayan Sherki («Lion») kabi nomlar bilan bog‘lanmoqda.

«Arsenal»ga top-hujumchi kerak
London klubi Dushan Vlaxovichni («Yuventus») sotib olishni rejalashtirmoqda. Uning transfer qiymati 60 million yevroni tashkil etadi. Shuningdek, jamoa Kiyran Tirni bilan xayrlashishni rejalashtirgan.

Serxio Ramos «Boka Xuniors»ga o‘tadimi?
Argentinaning TyC Sports nashri xabariga ko‘ra, «Boka Xuniors» Serxio Ramosni qishda o‘z safiga qo‘shib olishni rejalashtirmoqda. Ramos yozdan buyon erkin agent hisoblanadi.

Qishki transferlar oynasi shubhasiz, bir qator qiziqarli kelishuvlarga guvoh bo‘ladi.