Qatar amiri Tamim bin Hamad Ol Soniy G‘azo sektorida sodir bo‘lgan voqealarni genosid deb atab, bunga mas’ul shaxslar javobgarlikka tortilishi kerakligini bildirdi. U, shuningdek, mintaqadagi mojarolarni diplomatik yo‘l bilan hal qilishga chaqirdi. Bu haqda «Tasnim» axborot agentligi xabar berdi.

Amirning ta’kidlashicha, Qatar kelishmovchiliklarni muzokaralar va tinch diplomatik vositalar orqali hal qilish tarafdori. U mintaqaviy inqirozning iqtisodiy oqibatlariga to‘xtalib, Hurmuz bo‘g‘ozidagi kema qatnovi bilan bog‘liq uzilishlar va Ras-Laffan gaz inshootlariga yetkazilgan zarar Qatar eksportiga jiddiy ta’sir ko‘rsatganini aytdi.

Tamim bin Hamad Ol Soniy Qatar jahon suyultirilgan tabiiy gaz savdosining qariyb beshdan bir qismini ta’minlashini qayd etdi. Uning so‘zlariga ko‘ra, energiya ta’minotidagi har qanday uzilish xalqaro bozorlar va iste’molchilarga ham ta’sir qiladi.

Amir mintaqaviy strategiyaning to‘rtta asosiy yo‘nalishini sanab o‘tdi: mamlakat suverenitetini himoya qilish, xizmatlar va ta’minot zanjirlari uzluksizligini ta’minlash, o‘t ochishni to‘xtatish hamda kema qatnovini tiklashga ko‘maklashish, shuningdek, tomonlarni muzokaralar stoliga qaytarish.

Falastin masalasiga to‘xtalar ekan, Qatar amiri Isroilning G‘azo sektoridagi harakatlarini keskin tanqid qildi va G‘arbiy Sohilda falastinliklarga nisbatan ko‘chmanchilar hujumlari xavfidan ogohlantirdi.

«G‘azo sektorida sodir bo‘lgan voqea, shubhasiz, genosiddir va aybdorlar javobgarlikdan qochib qutula olmasligi kerak», — dedi u.

Amir Qatar mintaqada barqarorlikni ta’minlash, energetika infratuzilmasini himoya qilish va mojarolarni tinch yo‘l bilan hal etish bo‘yicha xalqaro hamkorlikni davom ettirishini ta’kidladi.