Putin Ukrainada saylov o‘tkazish uchun o‘t ochishni to‘xtatishni taklif qildi

Vladimir Putin «To‘g‘ridan-to‘g‘ri liniya» davomida, agar Ukrainada yangi hokimiyatni saylash bo‘yicha saylovlar o‘tkazilsa, Rossiyaning Ukrainaga berilayotgan zarbalarini bir kunga cheklashga tayyor ekanini bildirdi. Rossiya yetakchisining so‘zlariga ko‘ra, Moskva «saylovlar xavfsizligini ta’minlash haqida o‘ylab ko‘rishi mumkin». Bu ovoz berish kuni Ukraina hududining ichkarisiga zarbalar berishdan voz kechishni anglatadi.

Shu bilan birga, Putin Rossiyaning ham qarshi talablari borligini ta’kidladi.

«Ammo, albatta, biz chetlab o‘ta olmaydigan bir masala bor. Ya’ni, Rossiya hududida Ukraina fuqarolaridan iborat millionlab odamlar yashaydi — turli hisob-kitoblarga ko‘ra, besh milliondan o‘n milliongacha, — ular ovoz berish huquqiga ega», — dedi Rossiya rahbari.

Ukrainada Rossiyaning keng ko‘lamli bosqini boshlanganidan beri saylovlar o‘tkazilmagan. Shu sababli Vladimir Zelenskiy, jumladan, Oq uyda ham tanqid qilingan. Bunga javoban Ukraina prezidenti saylov o‘tkazishga tayyor ekanini, ammo faqat real va barqaror xavfsizlik kafolatlari mavjud bo‘lgan taqdirdagina bunga rozi ekanini bildirgan.