Prezident Paralimpiya chempionlari bilan telefon orqali suhbatlashdi

Prezident Shavkat Mirziyoyev Fransiya poytaxti Parij shahrida o‘tayotgan Paralimpiya o‘yinlarida terma jamoamizning hisobidagi oltin medallar sonini beshtaga yetkazgan yengil atletikachilar Elbek Sultonov, Yorqinbek Odilov va taekvondochimiz Asadbek Toshtemirov bilan telefon orqali suhbatlashdi. Bu haqda prezident matbuot xizmati xabar berdi.

Prezident o‘z nomidan va barcha yurtdoshlar nomidan sportchilarni samimiy qutlab, bu zafarlar eng aziz, eng ulug‘ bayram – Mustaqillik kuniga munosib sovg‘a bo‘lganini aytdi. Elbek Sultonov yadro uloqtirish bahslarida 16.45 metr natija qayd etib, oltin medalni qo‘lga kiritdi.

Bayramlarimiz bayramlarga ulanyapti. Yurtimizga uchinchi oltin medalni to‘ldirganing uchun chin qalbimdan tabriklayman. Yadro uloqtirish bahslaridagi finalda tajribali raqiblaringdan to‘la ustun kelib, ishonchli g‘alaba qozonding. Shaxsiy rekordingni ham yangilading, butun dunyo bunga tan berdi.

O‘tgan yili Parijdagi jahon chempionatida uchinchi o‘rin egallagan eding, shunday serg‘ayrat, bahodir o‘g‘illarimga zafar har doim yor bo‘lsin. Mustaqilligimiz bayramiga bu juda katta tuhfa bo‘ldi, dedi prezident Elbek Sultonov bilan suhbatda.

Engil atletikachi Shavkat Mirziyoyevga ishonch va tabrik uchun minnatdorlik bildirdi.

Kecha musobaqa jarayonida ikkita ukrainalik raqiblarim ham mendan o‘zib ketishdi. Shunda murabbiyim o‘z oldilariga chaqirib, sizni aytgan gaplaringizning hammasini menga yetkazdi. Bu menga kuch bo‘ldi. To‘rtinchi urinishda 16.45 natijani amalga oshirib, oltin medalni qo‘lga kiritdim, dedi Sultonov.

Prezident ularning murabbiylari va ota-onasiga minnatdorlik bildirib, kecha sovrindor bo‘lgan sportchilarimizga ham salom va tabrik so‘zlarini yo‘lladi.

Paralimpiya va Olimpiya natijalarini ko‘rib, juda ko‘p yoshlar sportga qiziqishdi. Ota-onalar sport maktablariga bolalarini olib kelishni boshladi. Bu ham men qilayotgan harakatlarimdan biri. Agar sizlar yo‘lboshchi bo‘lib, harakat qilsalaring, natija biz kutganday bo‘ladi, dedi Shavkat Mirziyoyev.

Yorqinbek Odilov nayza uloqtirish bahslarida 50,32 metr natijani qayd etib, oltin medalni qo‘lga kiritdi.

O‘tgan yili Parij shahrida Jahon chempionatida va Xitoyning Xanchjou shahrida Para Osiyo o‘yinlarida kumush medalni olgan eding. Bu gal 170 davlat ichida nayza uloqtirish bo‘yicha Paralimpiya o‘yinlarining mutlaq yetakchisi ekaningni yaqqol isbotlading. G‘ururlanaman, iftixorimsan, farzandim. Yana bir marta o‘zbek yoshlari qanday buyuk ishlarga qodirligi, buyuk ajdodlarimizga munosib voris ekaningni ko‘rsatding, dedi prezident Yorqinbek Odilovga.

Shuningdek, Shavkat Mirziyoyev sportchilar “Amerikada ham oltinlarni shoda-shoda olib kelishlariga ishonch bildirdi”, Odilov yuqori natijalarni qo‘lga kiritishga va’da berdi.

Taekvondochi Asadbek Toshtemirov Paralimpiya o‘yinlarida barcha raqiblarini yirik hisobda mag‘lub etib, oltin medalni qo‘lga kiritdi.

“Yarim tunda xalqimizga navbatdagi oltinni sovg‘a qilding. Taekvondo bo‘yicha o‘z vazningda dunyoda tengsiz ekaningni yana bir karra isbotlading. O‘tgan yilgi Meksikada o‘tkazilgan Jahon chempionatida oltin medalni qo‘lga kiritganda Parijdagi Paralimpiyada ham albatta g‘olib bo‘laman degan va’dangni bajarding.

Bu men, xalqimiz va ayniqsa yoshlar uchun g‘urur va iftixor. Tajribali raqibingni yirik hisobda — 37:17 yutding. Biz hayajon bilan ko‘rdik, hali yoshsan, endigina 22 ga to‘lding. Kelgusida og‘ir vaznga o‘tmoqchi ekaningdan ham xabarim bor. Kelgusida katta-katta shoh supalarda seni ko‘rish nasib qilsin”, dedi prezident.

Asadbek Toshtemirov yaratilgan sharoit, prezidentdan eshitgan bayram tabrigi va ishonchi uchun ham minnatdorlik bildirdi.