Nukusdagi portlashda halok bo‘lganlar soni 5 nafarga yetdi. Yana 4 kishining jasadi topildi

Xabar berganimizdek, kecha 29 yanvar kuni soat 16:15 larda Qoraqalpog‘iston Respublikasi Nukus shahri «Temir jol» MFYdagi 4 qavatli uyning to‘rtinchi qavatida joylashgan xonadonlarning birida havo-gaz aralashmasining chaqnashi sodir bo‘lgan. Yuzaga kelgan kinetik zarba natijasida bino konstruksiyalariga qisman shikast yetgan.

Zudlik bilan voqea joyiga FVV qutqaruvchilari va tegishli idoralar xodimlari yetib borib, qidiruv-qutqaruv ishlarini olib borishgan.

Eslatib o‘tamiz, 30 yanvar kuni soat 02:30 larda FVV qutqaruvchilari tomonidan turli darajadagi jarohatlar bilan vayronalar ostida qolib ketgan 5 yoshli qizaloq chiqarib olinib, malakali tibbiy yordam ko‘rsatish uchun shifoxonaga yuborilgan. Shuningdek, oradan 30 daqiqa o‘tib bino konstruksiyalari orasidan bir nafar fuqaroning jasadi topilgan edi. Erta tongga kelib, vayronalar ostidan yana 4 nafar fuqaroning jasadi topilib, jami halok bo‘lganlar 5 nafar bo‘ldi.

Voqea joyida Favqulodda vaziyatlar vaziri boshchiligida hodisa oqibatlarini bartaraf etish ishlari davom etmoqda.

Mazkur holat yuzasidan dastlabki tergovoldi surishtiruv ishlari olib borilmoqda.