Niderlandiya Patriot tizimlarini Ukrainaga topshirish rejalaridan voz kechdi

Niderlandiya Ukrainaga Patriot havo hujumidan mudofaa tizimini yubora olmaydi, chunki mamlakat ittifoqchilaridan biri yetkazib berishda ishtirok etishdan bosh tortdi, deb xabar bermoqda NL Times Niderlandiya mudofaa vazirligiga tayanib. Gap qaysi davlat haqida ketayotgani noma’lum.

May oyining oxirida Niderlandiya Ukrainaga bitta Patriot havo mudofaa tizimining qismlarini yetkazib berishini e’lon qildi. Keyin boshqa davlatlar bilan to‘liq tizimni yig‘ish bo‘yicha muzokaralar olib borilayotganiga aniqlik kiritildi. Iyun oyida Niderlandiya Mudofaa vazirligining o‘sha paytdagi rahbari Kaysa Ollongren Patriot havo hujumidan mudofaa tizimining qismlarini yig‘ish yakunlanganini e’lon qilgan edi. Uning aniqlik kiritishicha, tizim qismlari nomi oshkor etilmagan davlat bilan birgalikda yig‘ilgan.

Ukraina radar va kamida uchta uchirish moslamasini oladi deb taxmin qilingan edi. Biroq kecha, 13 sentyabr kuni Niderlandiya Mudofaa vazirligi "oldin aytib o‘tilgan ittifoqchi majburiyatlari bajarilmayapti", deb xabar berdi. Yangi mudofaa boshlig‘i Ruben Brekelmans shu hafta boshqa mamlakatlar Patriot tizimini yakunlash uchun komponentlarni qidirayotganini va Niderlandiya "bir nechta hamkorlar" bilan mavzu bo‘yicha munozaralar olib borayotganini aytdi.

Aprel oyida NATO bosh kotibi Yens Stoltenberg alyans davlatlari mavjud havo mudofaa tizimlarini inventarizasiyadan o‘tkazgani va ularning bir qismini Ukrainaga topshirishini aytgan edi. Tizimlar soni ko‘rsatilmagan. May oyida Germaniya 12 davlatning Ukraina havo hujumidan mudofaa tizimini mustahkamlashda ishtirok etishga tayyorligini ma’lum qilgan edi. Iyun oyida Financial Times manbalariga tayanib, Qo‘shma Shtatlar Patriot tizimlariga ochiq buyurtmalarni to‘xtatib qo‘yishi va mijozlar mamlakatlari uchun mo‘ljallangan qayta yo‘naltirish tizimlarini Ukrainaga yo‘naltirishini yozgan edi.